Ostegun goizaldean Hernaniko PSE-EEren egoitzan «mehatxua adierazten duten hainbat pintada» agertu zirela medio, prentsa oharra bidali du EH Bilduk, gertaera salatzeko.
«Erabateko desadostasuna»
EH Bilduk azaldu du lehenago ere izan direla horrelako pintadak; «Alderdi Sozialistak egoitza berria martxan jarri zuenetik ez da hau gertatzen den lehenengo aldia».
Hori horrela, gertaera salatu du. «Hernaniko EH Bildutik gure erabateko desadostasuna adierazi nahi dugu, eta era honetako ekintzak lekuz kanpo daudela eta guztiz salagarriak direla azaldu. Ezkertiar eta independentistok hartutako bidearekin ez datoz bat, eta gure estrategiatik kanpo kokatzen diren ekintzak dira».
Lanean jarraitzeko borondatea
Era berean, EH Bilduk azaldu du denbora dela, «Hernanin bizikidetza eta normalizazio politikoaren alde lanean» ari direla, baina onartzen du «aurretik lan haundia» dutela, «herritarrek sufritu dituzten eta sufritzen ari diren eskubideen urraketak erabat desagertu arte». Zentzu horretan, «denon parte hartzea eta elkarrekin pausuak ematea beharrezkoa» dela azaldu du, eta «bide horretan lanean elkarrekin jarraitzeko borondatea eta konpromisoa berretsi» ditu.