Kluben koparen azkeneko jardunaldia jokatu zuen Jaime Romero kadete astigartarrak igandean, Anoetako belodromoan. Bere klubarekin, Donosti Berrirekin hartu zuen parte, eta podiumeko gailurra ukitzeko aukera izan zuten, beraiena izan baitzen talderik onena.
Emanaldi bikaina, Romerok
Kadete mailan, Telmo Semperena lesioagatik bajan egonda, Jaime Romero izan zen jardunaldian Astigarraga ordezkatu zuen txirrindulari bakarra, eta ez nolanahi! Emanaldi bikaina eskaini zuen, eta bakarkako probetan erreferente izan zen.
Bere lanak, eta baita taldeak abiadura eta jazarpen probetan borrokatutakoak, txapeldun izatera eraman zituen.
Sailkapenean, bigarren gelditu zen Asturiasko Selekzioa, 13 puntura. Hirugarren izan zen Lezoko Allerru taldea, bigarren postutik oso gertu.
Urko Semperena, Gipuzkoako selekzioarekin
Urko Semperena ere baja izan zen Donosti Berriren junior taldetik; hala ere, azpitxapeldun izan ziren Anoetan.
Gipuzkoako Selekzioak deituta Bourdeauxeko belodromoan izan zen Semperena astigartarra egun berean, Madisongo Neguko Txapelketa jokatzeko. Bertan, hamargarren izan zen kanporaketa proban, puntuaketarena irabazi zuen, eta zilarrezko domina etxeratu zuen Madison proban, Imanol Isasa oiartzuarrarekin batera egindako lana bikainagatik.