Mapa Morea lantzeko partehartze prozesua jarri zuen martxan Udalak urte bukaeran, «herriaren hirigintza-antolaketa genero ikuspegitik aztertu eta mapa osatzeko».
Dagoeneko eman diote bukaera prozesuari, eta aurreko asteartean, urtarrilaren 24an, egin zieten aurkezpena Udal ordezkari eta teknikariei.
Hainbat saio partehartzaile egin dira Mapa Morearen prozesuan zehar: tartean, Herri Eskolan edota zaharren egoitzan.
Iritzi eta proposamenekin, txostena
Udalak azaldu du txosten batean jaso dutela bertan azaldutakoa, hau da, «azaroaren amaieran eta abenduaren hasieran antolatutako partehartze saioetan jasotako bizilagunen ideiak eta iritziak». Txosten hori Udalaren web orrian egongo da ikusgai aste honetan bertan.
Lan hori osatzeko, «ekarpen guztiak fitxa ezberdinetan jaso dira. Horietan adierazten dira herritarren iritziz, udalerriko auzo eta leku ezberdinetako alde positiboak eta negatiboak». Gainera, iritzi eta proposamen horiei, diagnostiko teknikoa ere, gehitu dio Udalak.
Hainbat saio, horretarako
Informazio hori jasotzeko, hainbat saio partehartzaile antolatu direla azaldu du Udalak: «esaterako, Herri Eskolako DBH 3 eta 4. mailako ikasleekin, zaharren egoitzako kideekin eta baita pleno aretoan izandako bilera ireki batera bertaratu nahi izan zuten bizilagun guztiekin».
Ibilaldia, aurrerago
Mapa Morearen prozesu partehartzailean azaleratutakoak, ibilaldi baten bidez azaltzeko asmoa ere azaldu du Udalak: «aipatu diren lekuetatik abiatuta, ibilaldi bat antolatuko da bizilagunekin egingo dena». Data oraindik ez dute zehaztu.