Jesus Mari Santos alkateak dimisioa aurkeztu ondoren, asteartean egin zen Astigarragako alkate berria aukeratzeko ezohiko Plenoa. Bertan erabaki zuten, EAJ eta PSE-EEren aldeko botoekin, Zorione Etxezarragak hartzea aginte-makila. EH Bilduk, aldiz, Andoni Gartziaren alde egin zuen.
Alkate berriaren aukeraketaren harira, hausnarketa egin du alderdi abertzaleak prentsa-ohar bitartez.
«Hitzarmen atzerakoiaren bigarren kapitulua»
EH Bilduren ustez, «plenoa inolako sorpresarik gabe gauzatu zen: EAJk alkatetzari eutsi zion, PSE-EEren ezinbesteko botoarekin». Beraien ustez, «Astigarragatik kanpo eta Astigarragaren interesak eta beharrak kontuan izan gabe, EAJ eta PSE-EEko elite politikoek duten hitzarmen atzerakoiaren bigarren kapitulua izan zen plenokoa».
Eta horrela, «udal hauteskundeetan alderdi bozkatuena izan zen EH Bildu baztertu zen, herritarrek egindako hautua desitxuratuz». Diotenez, «argi geratu da EAJk, PSE-EEren morroi lanetan jarraituko duela. Herria ezagutzen ez duen zinegotziaren menpekotasunean oinarrituko da EAJren jarduna, eta ondorioz, Udalaren egitasmoa». Beraz, argi diote: «hemen galtzaile bakarrak, EAJ eta PSE-EEri esker, berriz ere, herritarrak dira».
«Zaharrak berri»
Alkate berria egon arren, ez da ezer aldatuko EH Bilduren ustez: «Udalak norabide okerrean jarraituko du, eta ibilbidea ez da aldatuko, beraz, zaharrak berri». Gainera, diotenez, «alkate kargua orain arte itzalean gobernatzen aritu den pertsonak eskuratu du; herritarrek bozkatu ez zuten alkategaiak hartu zuen aginte makila, Astigarragako Udalean aspaldiko ezaguna den Zorione Etxezarragak».
Horregatik guztiagatik izendapen berria «kezkarekin» hartu du EH Bilduk. Hori arrazoitzeko, hainbat adibide jarri ditu: «herriko eskolak bizi izan zuen momentu latzenetako arduradun nagusietakoa izan zen: ikasleak hainbat urtez barrakoietan ikasi behar izan zuten garaikoa. Gainera, askotan onartu du bere apustua eskola pribatua dela. Hezkuntza publikoari egindako azken erasoa duela gutxi ikusi dugu, haurreskola berria Urumea Berrira pasatzeko aurkari nagusia izan baita. Bestetik, Kultur Etxearen proiektua herritarrekin eztabaidatu eta konpartitzeko beharrik ez dagoela aitortu eta Eternal Running proba xahutzailea ekartzea proposatu zuena ere bada. Azkenik, 2007-2011 urtean, EAJ eta H1!eko legealdian, Udal gobernuaren gehiegikeriak babesten ez zituelako udal arkitektoari zigor espedientea irekitzea eskatu zuen alkatea dugu. EH Bilduk alkatetza eskuratzean, langilearen aurkako espedientea bertan behera utzi zuen».
Lanean, oposiziotik
Horren aurrean EH Bilduk lanean jarraituko duela dio: «Astigarraga eta astigartarren onura lortzeko lanean jarraituko dugu oposiziotik, herritik eta ahal dugun esparru guztietatik». Eta saiatuko dira, «estrategikoak diren gaiak taxuz eta partehartzearekin burutu daitezen».