Sinatu dute kooperazio hitzarmena Udalek, eskualdean zerbitzu bateratua eskaintzeko

Udalez udal onartu ondoren, atzo formalizatu zuten kooperazio hitzarmena, Beterri Bu­runtza eskualdeko sei udalek. Andoaingo udaletxean elkartu ziren hitzarmena sinatzeko. Bertan ziren, Zorione Etxeza­rraga Astigarragako alkateordea, Luis Intxauspe Hernaniko alkatea, Mikel Pagola Urnie­ta­ko alkatea, Jesus Zaba­llos Lasar­te-Oriako alkatea, Xabier Arregi Usur­­bil­go alkatea, eta Ana Ca­rrere Andoaingo alkatea.
Karrerek berak aurkeztu zuen hitzarmena, eta nabarmendu zuen, «oso pauso ga­rrantzitsua» dela eskualdearentzat: «gurea da, eskualdeko egiturarik ez duen bakarra, arlo sozio-ekonomikoarekin lotutako programak eta zerbi­tzuak ku­deatzeko. Eta hitzarmen honen helburua da, hu­tsune hori betetzea. Horrela, arlo horretako politikak eta jardunak, modu koordinatuan eskainiko zaizkie eskualdeko herritarrei. Eta pauso honek, gainera, erraztuko du bidea, etorkizunean garapen agentzia edo eskualdeko izaera duen erakunde bat eratzeko».
Eta nabarmendu dute, udal bakoitzak dituen baliabideak hobeto aprobetxatu, eta zerbi­tzu hobea eskainiko dutela.

Batzorde Kudeatzailean, udal bakoitzeko bi kide
Programa eta zerbitzuak antolatzeko, Batzorde Kudeatzaile bat sortuko dute, hamabi kide izango dituena: udal bakoitzeko, bi kide. Eta finantziazioa ere, udalen ekarpenekin egingo da; 2017an, 1.290.976 euro.
Azkenik, argitu zuten lau urterako dela hitzarmena, bai­na udalek eskualdeko garapen agen­tzia edo antzekorik sortuz gero, hi­tzarmena bertan behera geratuko dela; eta erakunde horrek har­tuko dituela, mar­txan jarritako programa, pro­iektu eta zerbitzuak.