Herriko memoria historikoa berreskuratzeko asmoz, ikerketa beka bat eskainiko du Udalak, 6.000 eurokoa. Bekaren helburua da, lan bat egitea, jasoko dituena 1936ko estatu kolpean, Gerra Zibilean eta Frankismoan eman ziren giza eskubideen urraketak, eta horien ondorioak.
Horrekin, Udalak osatu nahi du, Astigarragako memoriaren mapa.
Atzo argitaratu zen bekaren deialdia, Gipuzkoako Aldizkari Ofizialean; eta gaurtik hasita, hamabost eguneko epea dago eskaerak aurkezteko, otsailaren 11ra arte, udaletxeko Erregistroan.
Aurkeztu daitezkeenak, Buruntzaldean eta Donostian bizi direnak
Beka deialdira aurkezteko aukera izango dute, Buruntzaldean edota Donostian bizi diren herritarrek; hau da, Astigarraga, Hernani, Usurbil, Lasarte-Oria, Urnieta, Andoain eta Donostian bizi direnek.
Deialdia atzo argitaratu zen, Gipuzkoako Aldizkari Ofizialean, eta gaurtik hasita, 15 egun naturaleko epea dago, eskaerak aurkezteko; beraz, otsailaren 11 izango da, aurkezteko azkeneko eguna.
Udaletxean entregatu beharko dira eskaerak eta dokumentazio guztia, Udal Erregistro orokorrean, hain justu. Bekari buruzko informazio guztia, eta baita eskaerak baloratzeko erabiliko dituzten irizpideak ere, laster jarriko dituzte interneten, Astigarragako Udalaren web orrian: www.astigarraga.eus. Boletinean ere argitaratu da informazio hori guztia.
«Giza eskubideen eta elkarbizitzaren aldeko konpromisoa hartu dugu»
Memoria historikoa berreskuratzeko bekarekin, bere konpromisoa berretsi nahi du Udalak: «giza eskubideen eta elkarbizitzaren aldeko konpromisoa hartu dugu, eta konpromiso hori gauzatze aldera, memoria historikoa berreskuratzeko bideak urratu nahi ditugu», nabarmendu du.