Urtero bezala, kurtso hasierako erakustaldia egingo dute bihar, Hernaniko Gimnasia Erritmikoko klubeko kideek. Kiroldegiko aurreneko pistan izango da, goizeko 10:45etatik aurrera.
Gimnasia akrobatikoa, berrikuntza
Bertan izango dira, hain zuzen, Hernaniko Gimnasia Erritmikoaren parte diren 3garren mailatik gorako gimnasta guztiak; hau da, benjamin mailatik hasi, eta senior mailara bitartean daudenak. Horiez gain, aurten aurrenekoz sortu den gimnasia akrobatikoko neska-mutilek ere parte hartuko dute erakustaldian; Lehen Hezkuntzako 2garren eta 4garren mailakoak dira, hain zuzen.
Denera, 32 dantza
Horien guztien partehartzearekin, beraz, 32 dantza ikusi ahal izango dira kiroldegiko pista nagusian; erdia bakarkako lanak izango dira, eta beste erdia, taldekoak. Laugarren mailatik gorakoek, aurtengo txapelketa eta topaketetan erakutsiko dituzten dantzak aurkeztuko dituzte. Txikienek, berriz, entrenamenduetan landu dutena erakutsiko dute.