Hernani eta Gernikak Landaren jokatu behar duten partidua martxoaren 18an edo 19an izango da. Pasa den asteburuan neurtu behar zituzten indarrak, baina uholdeen eraginez, bertan behera gelditu zen neurketa. Aste honetan erabaki behar zuten, bi taldeen zuzendaritzek, zein egunetan jokatu hamalaugarren jardunaldiko partidua, eta atzo adostasun batera iritsi eta gero, data jarri zioten. Martxoaren hirugarren asteburuan jokatuko dute.
Bestetik, Txinpartak taldearen asteburu honetako partidua, martxoaren 4ra atzeratu da, Aieteko zelaiean jokatuko da.
Santboiana-Hernani
Hernanik igande honetan hamabosgarren jardunaldiko partidua jokatuko du igandean, 12:00etan, Baldiri rugby zelaian, Santboianaren aurka. Talde kataluniarra espainiako zaharrena da eta historikoena. Ia urtero sailkapenaren goiko postuetan egoten da sailkatuta, eta aurten ere bosgarren postuan dago, hirugarrenarengandik bi puntura soilik.
Hernanik, nahiz eta pasa den asteburuan ez jokatu, hamargarren postuan jarraitzen du sailkapenean. Aurkari nagusiek ez zuten garaipenik lortu, ez eta punturik batu; F.C. Barcelonak salbu, hauek bonus puntu bakarra. Igande honetako neurketa oso zaila da Hernanirentzat eta izango duten helburu nagusia bonuseko punturen bat lortzea izango da.