Aurreko asteburuko norgehiagoka Landareren egoeragatik bertan behera geratu ondoren, bihar jokatuko du Ohorezko Mailako errugbi taldeak, hamabosgarren jardunaldiko partidua. Bartzelonako Santboiana taldea izango dute aurrez aurre hernaniarrek, eguerdiko 12:00etatik aurrera. Beraien etxean izango da hori, Sant Boi herriko Baldiri Aleu zelaian.
Bonusa lortzea, helburu
Biharkoa arerio zaila izango da Hernanirentzat. Etxetik kanpo partidu bakarra irabazita iritsiko dira Ohorezko Mailako errugbilariak Bartzelonara, eta beraz, bonusa lortzea izango dute helburu nagusia.
Partidu bat gutxiago jokatuta, hamargarren postuan dago Hernani, eta bosgarrenean dagoena izango du aurkari. Talde kataluniarra ez da edozein, Espainiako talde historikoena da, eta normalean, Ohorezko Mailako aurreneko postuetan bukatzen du.