Elkartea sortzeko premia, konplejuak utzi, eta etxe-kaleratzeei ‘taldean’ aurre egiteko

Hernanin talde berri bat sortzeko bidean da, joan den ostegunetik, etxe kaleratzeei aurre egiteko. Premia izuga­rria dela, eta Hernanin kasu asko eta asko daudela adie­razi zuten Donostiako Kalera­tzeak STOP Desahucios talde­ko kideek. Ikusleek asko par­te hartu zuten debatean, eta bukaeran deialdi bat egin zu­ten taldea sortzeko: dato­rren ostegunean, martxoak 14, 19:00etan Biterin.

Jende asko bildu zen Are­to Nagusian, eta hizketan aritu ziren, Donostiako tal­de­ko ki­deak: Rosa Garcia buru zu­tela, Irati eta Amparo, eta Txema (Hernaniko ordezkari bezala).

«Hernani ez da salbuespena, hemen ere kasu asko daude»
Rosa Garcia da Kaleratzeak STOP elkartean telefonoa har­tzen duena, eta hark adierazi zuen, Donostiako bulegora deitzen dutela Hernanitik. Hargatik dakite Hernanin ere kaleratze kasu asko daudela. «Hernaniko kasu zehatzik ez daukagu, ez dagoelako inor horri jarraipena egiten, baina badakigu kasu asko direla. Hernani ez da salbuespena».

Etxea galtzera dijoana erruduna da edo ez da?
Biterira inguratutako jendeak asko hitz egin zuen oste­gu­nean. Tartean izan zen ezta­baida txiki bat, errua zeinena ote den. Alegia, zenbaitek azal­du zuen, etxea galtzera dijoa­nak erru zati bat ere ba­due­la, behar baino hipoteka haundia­goan sartzeagatik. «Burua de­noi joan zaigu, eta hori onar­tzetik hasi behar dugu». Sen­tsa­zio hori nahiko tipikoa dela azaldu zuten Kaleratzeak STOP taldeko kideek, eta hori superatu beharra dagoela. «Iruzur bat izan da, eta jarri diguten amuari heldu egin diogu. Horraino ados, baina horrek ez die eskubiderik ematen egiten ari direna egiteko. Alegia, etxea galdu eta hala ere zorretan segitzea, ordainketan atzeratzea­gatik %25eko interesak ordaindu beharra... hori dena ez da bidezkoa, eta horren kontra lan egin behar dugu».  

Politikoak eta bankuak, «estafa honetan inplikatuta»
Banketxe guztiak eta batez ere Kutxabank salatu zuten os­te­gunean, Biterin, eta denak po­li­tikoekin «konpintxatuta» daudela adierazi zuten. «Kutxabankena izugarria da. Fernandezek berak esan zuen Kutxabankek ez zuela beste inor kaleratuko, eta geroztik kaleratze gehien egiten ari dena bera da». Ikusleetako batek adierazi zuen, Kutxa­bank pribatizatzen ez zegoela uzterik, Aurrezki Kutxetako dirua bertan dagoelako, eta hori herritar guztien ondarea delako.

Politikoak ere erabat in­pli­katuta daudela adierazi zuten, kaleratzeen kontrako neurriak hartuko zituztelako bestela.

Etxea galdutakoan, hipoteka ere bukatu
Denen iritziz, erremedio na­gu­sia dacion en pago delakoa da. Alegia, etxebizitza galduta­koan, zorra kitatzea. Kasu prak­tiko bat jarri zuten, egoera zein den adierazteko. «180.000 euroko hipoteka daukan batek, etxea galdu, eta hala ere 120.000 euro ordaindu behar dizkio bankuari, interes, gastu judizial eta abarretan».