Hemezortzi urte ditu, eta irabazia dauka irabazi zezakeen ia guztia: Nazioartekoa, Euskal Herrikoa, Gipuzkoa... Bihar beste torneo haundi ba-ten bila aterako da Amaia Irazustabarrena hernaniarra, Ruiz de Larramendi lagun duela, baina aurrean inoizko aurkari gogorrena izango du: Maider Mendizabal, momentuko pelotari onena. Mendizabali laguntzen, iruñar gazte bat, Bea Andueza, aurrelari indartsua. Bi partidu jokatuko dira bihar, 11:00etatik aurrera. 3/4 postuak, eta 12:00etan finala. 3/4 postuetarako ariko dira: Muneta-Serre, eta Etchelecu-Arozena. 13:00a aldean, saribanaketa. Sarrera dohainik da, eta pelotako materiala zozketatuko da.
«Maila honetan defentsan lan egitea tokatzen zait»
Hain justu, Mendizabal mugituaraztea omen da klabea, biharko finala irabazteko. «Mendizabal mugitzen badugu, irabazi dezakegu. Bestela, hark sekulako kolokazioa dauka, eta berak dominatuko du». Irazustabarrena aurrelaria da, eta biparetekoa eta txokoan moztea «ikaragarri gustatzen» omen zaio. Bihar ere saiatuko da horretan, baina berak dioenez, orain defendatzea ere asko tokatzen zaio. «Maila honetan defentsan lan egitea asko tokatzen zait. Andueza bera ere oso aurkari gogorra da, eta indartsua. Behartuko nau, baina nik ere ez dizkiot gauzak erraz jarriko».