«Aro berri bat hasi da Gipuzkoarentzat», esan zuen atzo Larraitz Ugartek, txartel bakarra izango dena martxan jarri bezperetan. Hernaniarrak ere hasi dira Mugi txartela eskatzen, Gipuzkoa guztiko garraio publikoetan erabili ahal izango dena, eta tarifa berdinarekin. Hernaniko lineako bi autobusetan eta herri barruko autobusean ere erabili ahal izango da. Renfen erabili ahal izango da, baina tarifa ezberdinarekin. Hernanin 14.000 Lurraldebus txartel daude (herritar batzuk bi Lurraldebus txartel dauzkate) eta horiei zuzenean tramitatuko zaie Mugi txartela, ezer egin beharrik gabe. Hala ere, asko dira dagoeneko Mugi eskatu dutenak: 400 hernaniar, guztira.
«Tarifa bakarra,
hito historikoa»
Astelehenetik aurrera martxan izango da Mugi txartela, eta Euskal Herrian Gipuzkoa da lehenengo lurraldea tarifa bakarrak jarriko dituena garraio publiko guztietan. Larraitz Ugarte Azpiegitura Diputatuak adierazi zuenez «hito historikoa izango da hori Gipuzkoarentzat, eta herri batetik bestera mugitzea errazagoa izango da». Alde horretatik satisfakzioa eta poza azaldu zituen Ugartek, instituzioen arteko lana txukuna izan delako.