Derbia eta Gipuzkoako Kopa galdu zituen atzo Hernanik, Ordizian. Hasieratik, ordiziarrak gehiago izan ziren. Baina hala ere, amore eman gabe eutsi zioten hernaniarrek, eta amaiera aldera puntu batzuk lortu zituzten, ez nahikoak, ordea, 41-12 galdu zuten. Lehenengo zatia bukatzerako, Ordiziak 34 puntu zituen, eta Hernanik berriz, bat ere ez. Hernanik ordez, ez zuen amore eman, eta tinko eutsi zion partidua bukatu arte. Egindako lanaren emaitza izan ziren lortutako 12 puntuak. Igor Genuak lortu zituen lehenengo 7ak, entsaioa egin eta ondoren, hau gauzatuta. Partidua bukatzeko minutu baten faltan berriz, Iraitz Garmendiak lortu zuen bigarren entsaioa, baina hau ez zuten gauzatzerik lortu. Azkenean, etxera itzuli ziren, bonusik ere lortu gabe.
Giroa, hotza baina goxoa
Elur asko egin ez bazuen ere, hotz haundia egin zuen atzo Ordizian. Ondorioz, Altamira zelaiaren ondoan egitekoa zen bazkarira jende gutxi gerturatu zen. Hala ere, herrian barrena zaletu asko ibili zen, tabernetan eta txarangarekin gora eta behera; baita hernaniarrak ere. Jarraitzaileen goxotasunik ez zuten falta izan jokalariek.
Atleticoren aurka, bai ala bai
Hurrengo partidua martxoaren 16an jokatuko du Hernanik, Atletico de Madriden aurka, Landaren. Nahitaez irabazi beharko dute.