Hernaniko KZguneak 10 urte betetzen ditu aurten. Urteurrenarekin batera, salto berria eman duzue, Windows-etik KZnux-era, software librera pasa zarete.
KZguneak sortutako sistema eragile berria da, librea, Linuxeko Ubuntu distribuzioan oinarritua. Orain ez gaude lizentzien menpe. Hau da, Windows-ak bezalako aukerak ematen dizkigu ordenadorea erabiltzeko orduan, baina horrez gain, aukera dugu arazoren bat izanez gero, guk konpontzeko. Erabiltzaileak aukera du analizatzeko, modifikatzeko, distribuitzeko eta kopiatzeko. Gainera, doakoa da eta horrek abantaila ekonomikoak ere baditu. Herri bakoitzak bataz beste, 10 ordenadore izango ditu eta ordenadore bakoitzean Windows instalatu behar baldin baduzu... Pentsa!
Horrez gain, birusik ez dago eta programak instalatzeko orduan ez dizu arazorik ematen. Eta birusik ez dagoenez, ez duzu antibirusik behar.
Hernanitik, bertatik sortutako proiektua da, baina zabaltzen ari zarete.
Bai, iaz proba moduan hemen erabili genuen eta ikusita ondo dabilela, Gipuzkoan, Araban eta Bizkaian zabaltzen hasi gara. Gipuzkoa mailan, Orion, Deban, Arrasaten, Lasarten, Mutrikun... dagoeneko jarri dute.
Erabiltzaileek nabaritzen al dute aldaketarik? Ondo moldatzen al dira?
Ikonoak aldatzen dira, pantailan azaltzen diren programen irudiak ez dira berdinak, baina erabilera bai. Aukera berdina duzu eta gure erabiltzaileak oso ondo moldatzen ari dira. Berdin berdin nabegatu dezakezu, dokumentuak idatzi...
10 urte hauetan, nola aldatu da KZgunea?
10 urtetan, 3 fase izan ditu KZguneak. Hasierako hiruzpalau urtetan, Alfabetizazio digitala egin zen. Jendeari eskaini zitzaion informatika mundura sartzeko zerbitzua, orokorrean.
Bigarren fasean, Administrazio digitala landu genuen. Zerbitzu publikoetako tramiteak internetez nola egin erakutsi genuen.
Orain, hirugarren fase honetan, software librera pasa gara.
Ze helbururekin jarri zen martxan?
Gainerako herrietan bezala, Eusko Jaurlaritzak jarri zuen martxan, garai hartan zegoen `hutsune digitala´ zela eta. Gazteek ordenadoreak erabiltzen ikasten zuten eskoletan, eta zaharrek ez zuten garai hori bizi. Baina tartean baziren hain zaharrak ez zirenak, 40 urte ingurukoak eta ideiarik ez zutenak. Horiei zuzenduta jarri zen martxan. Eta gaur egun ere, formakuntzara etortzen diren gehienak 40 urte inguru edo gehiagokoak dira.
Jendeak gustora hartu al zuen?
Jendeak oso gustora hartu zuen zerbitzu hau eta aurreneko bi urteak oso gogorrak izan ziren. Jende asko etortzen zen. KZgunea martxan dagoenetik, 3200 erabiltzailetik gora izan ditugu hemen eta lehenengo urte eta erdian, 1000 erabiltzaile izan genituen.
Ikastaro ezberdinak ematen dituzue, zein da arrakasta gehien duena?
Oinarrizko internet ikastaroan ibiltzen da jende gehiena. Hilabetean 15 bat ikasle etortzen dira oinarrizko ikastarora. Interneten ibiltzera berriz, egunero 50 bat etortzen dira.
Eta oinarrizko ikastaroaz gain, orain dexente lantzen ditugu sare sozialak: facebook, twitter... Askok etxetik ezagutzen dute, seme-alabei entzunda, eta batzuk beldurrez etortzen dira, ez dakitelako zer diren eta kezkatuta daudelako seme-alabengatik. Hemen ezagutu egiten dute eta orduan ikusten dute kezkatu behar duten ala ez.
Bestalde, hemen ikastaroren bat jaso duena, normalean, saiatzen da eboluzionatzen. Jakinmin hori badute gauza berriak ikasten joateko.
KZguneko erabiltzaile izateko zer egin behar da? Hernaniarra izan behar al da? Inskripzio orria betetzea nahikoa da eta berdin du nongoa izan. Hernaniar batek ere badauka beste herri bateko KZgunea erabiltzeko aukera. Hona gainera, Astigarragako eta Urnietako jende asko etortzen da, besteak beste. Izan ere, Astigarragan ez dute egunero irekitzen KZgunea eta Urnietan goizez edo arratsaldez egoten da irekia. Hemen, berriz, goizez eta arratsaldez. Egia esan, KZgunea oso aukera ona da. Formakuntza jasotzeko aukera daukazu eta ikastaroa bukatzean, gu hemen gaude laguntzeko. Eta dena dohainik da.
2010etik, IKT aholkularitza zerbitzua ere eskaintzen duzue. Zer moduz funtzionatzen du?
Oso ondo, jende asko etortzen da aholkuak eskatzera eta zalantzak argitzera. Izan ere, aholkuak ematen ditut mikroinformatikari buruz orokorrean, ez bakarrik ordenadoreei buruz. Hau da, kamarei buruz, tabletei buruz... Asko eskertzen den zerbitzua da.
Jende asko etorri izan zait, esaterako, Poliziaren birusa deiturikoarekin, edo antibirus faltsuak direla eta... Interneta ze konpaniarekin kontratatzea komeni den ere galdetzen didate. Hori bai, hau ez da konponketa leku bat, laguntza emateko zerbitzu bat da.
Sei ikastaro aukeran
- Oinarrizko internet ikastaroa (20 ordu): internet erabiltzen ikasi, PC bat zer den ezagutu, posta elektronikoa erabiltzen ikasi...
- e-Administrazioa (20 ordu): Administrazio publikoko tramiteak internetez nola egin.
- Sare sozialak (14 ordu): Facebook, Twitter, Dilicious, YouTube...
- Software librea (12 ordu): zer den, betebeharrak, onurak eta eragozpenak, lizentzia motak... KZnux sistemarako sarrera.
- Irudia eta soinua (14 ordu): xormena askatu GIMP, Audacity eta bestelako tresnak erabiliz.
- Google apps (14 ordu): zure antolaketa pertsonala edo enpresakoa erraztuko dizkizuten Google tresnak zeintzuk diren ikas ezazu.
Ikastaro guztiak doakoak dira, ia bi asteko iraupena dute, eta erabiltzaileek, ondoen egokitzen zaien ordutegia aukeratu dezakete.
Informazio gehiago:
- KZgunea, Biterin.
- www.kzgunea.net.
- 943 02 36 50.
Ordutegia: astelehenetik, ostiralera, 09:00-13:00 eta 16:00-20:00.