Laugarren urtez, sagardoa dastatzen ikasteko probaketa gidatuak egingo dira Hernani, Astigarraga, Andoain, Usurbil eta Azkaingo hainbat sagardotegitan. Aurten gainera, hainbat berrikuntza izango dira: familiei, hau da, guraso eta seme-alabei zuzendutako dastaketak egingo dira; sagardozaleek afaltzeko aukera izango dute dastaketaren ondoren; eta maridaje (nahasketa) gastronomikoak egingo dira.
Zelaian, martxoan
Sagardo probaketa gidatu hauek hasi dira dagoeneko. Otsailaren 16 eta 23an eta martxoaren 2an Astigarragako Zapiain sagardotegian egingo dira. Bertako probaketak zuzenduta daude sagardozaleei, eta guraso eta seme-alabei. Dastaketa eta pintxoen prezioa 10 eurokoa da helduentzat, eta dohakoa gurasoek lagunduta joandako 18-25 urte bitarteko gazteentzako.
Hernaniko Zelaia sagardotegian ere egingo dira probaketa gidatuak, baina hauek, martxoan izango dira. Hil horretan bertan egingo dira probaketak, baita ere, Astigarragako Gurutzeta eta Usurbilgo Saizar sagardotegietan. Apirilean berriz, Azkaineko Txopinondo sagardotegian eta Andoaingo Gaztañaga sagardotegian egingo dra, eta maiatzan, Astigarragako Bereziartuan.
Informazioa eta izen-ematea
Probaketa gidatu hauetan parte hartzeko izena eman behar da. Horretarako, harremanetan jarri Sagardoaren Lurraldea elkartearekin, 943 55 05 75 telefonora deituta, edo info@sagardoarenlurraldea.com helbidera idatzita.
Hilero egingo diren probaketen datak eta hauen inguruko xehetasunak argitaratuko dira www.sagardoarenlurraldea.com webgunean.