Bilioi bat zutik indarkeria matxistaren aurka izeneko ekimena antolatu dute gaur 19:30etan Donostiako Bulebarrean eta Hernaniko Berdintasun Kontseiluak dei egiten die herritarrei bertan parte hartzeko. «Jarri zu ere zutik! Indarkeria matxistaren aurka, bilioi bat zutik!». Ekimen honen helburua da, mundu guztian zehar izaten diren emakumeenganako indarkeria salatzea. «Izan ere, munduan hiru emakumetatik bat, bortxatu edo jo egingo dute bere bizitzan zehar. Mila milioi emakume dira; bilioi bat emakume bortxatuak edo joak! Basatikeria bat da!», azaldu dute.
Bilioi bat pertsona, dantzan
Ekimen honen bidez, aldarrikapen modu gisa, espazio publikoa dantzan okupatzea proposatzen dute: «bilioi bat pertsona dantzan, iraultza bat baita! Gainera, San Valentin eguna dela kontuan izanik, aproposa da emakumeonganako indarkeriarekin lotura zuzena duen `maitasun erromantikoaren´ ideia zalantzan jarri eta puskatzea».