Santanderren barrena ibili eta orain Bizkaia eta Gipuzkoan sartu da Rossitarren zirko italiarra. Beasainen sekulako arrakasta izanda iritsi dira Hernanira, eta gaurtik astelehenera sei emanaldi prest dituzte, bi ordukoak. «Trapezioa, akrobazia, uztaiak, kontorsionismoa, patinak, pailazoak... bi orduko ikuskizuna prest daukagu hernaniarrentzat», diote Ricard Panades eta Moreno Rossik, jirako zuzendariak eta montaje arduradunak.
«Zaldiak ere aterako ditugu»
Florida kalean jarri dute zirkoa, AMR fabrika zegoen horretan, eta lurra gogor xamarra ote den aitatu diote Kronikari, baina moldatuko omen dira. «Lur gogorra da eta hondar asko bota beharko dugu, baina zaldiak aterako ditugu».
80 laguneko ‘familia’
Rossitarrak dira zirkoaren jabeak, eta dagoeneko bosgarren jenerazioa ari da zirkoaren munduan. Rossitarrak eta ingurukoak, guztira 80 lagun dira familia hau osatzen dutenak. Mugimenduan bizi dira, munduan batera eta bestera, eta behar duten guztia gainean daramakite. «Baita eskola ere! 25 umeri ematen dizkiegu klaseak».
Emanaldiak
Gaur, 19:30
Larunbata: 17:00 eta 19:30
Igandea: 12:00 eta 17:00
Astelehena: 19:30
Prezioak: 7 - 10 - 15 euro.