Hernaniarrek emaitza ederrak lortu zituzten asteburuan Euskadiko Txapelketetan. Pista estalian, Maitane Iruretagoyena nabarmendu zen, irabazi egin baitzuen 60 metroan. Horrez gain, Ane Lopez de Arregik zilarra ekarri zuen etxera, luzera jauzian, eta denboraldi onari segida eman dio, horrela. Hainbat domina gehiago ere irabazi zituzten hernaniarrek, eta baita Espainiako Txapelketarako pasea ere.
Joxeba Lizeaga finalean,
60 metroan
Hernaniar gehiago ere izan ziren Belodromoan, Euskadiko txapelketan, eta ez alperrik, emaitza politak lortu baitzituzten: Joxeba Lizeaga finalean izan zen 60 metroan, eta 6garren postua lortu zuen. Altueran berriz, 8garren izan zen Lizeaga, eta beste hernaniar bat aurretik ibili zen: Julen Iruretagoyena; Julenek 4garren postua lortu zuen.
Maialen Pavonek 7garren egin zuen altuera jauzian, eta Jon Muruak zortzigarren, 800 metroan. Hernaniar gehiagok ere parte hartu zuen txapelketan: Julen Mazon, Unai Roldan, Laxia Arakama, Malen Martinez, Paula Fernandez eta Uxue Lopezek, hain zuzen ere.
Sergio Roman eta
Eider Aldabe,
Espainiako Txapelketan
Euskadiko kross txapelketa ere jokatu zen asteburuan, eta bi hernaniarrek lortu zuten pasea Espainiako txapelketarako: Sergio Roman eta Eider Aldabe Oropesan izango dira, beren taldeek 1go postua eta 3garrena lortuta. Joxe Mari Muruak ere lan ona egin zuen beteranoetan, Espainiakora sailkatzerik izan ez arren.
Pista estaliko Espainiako Txapelketa Belodromoan jokatuko da, datorren asteburuan. Han izango da Maitane Iruretagoyena hernaniarra, beste emaitza on baten bila.