Mugi txartela aurkeztu zuten atzo Gipuzkoako Garraioaren Lurralde Agintaritzak, Eusko Jaurlaritzak, Gipuzkoao Foru Aldundiak eta hainbat herritako udalek, tartean Hernanikoak. Txartel berri honi esker, gizpukoarrek lurralde osoko garraio publiko guztiak erabili ahal izango dituzte, eta tarifa-sistema bateratu bat aplikatuko zaie. Martxoaren 4tik aurrera jarriko da martxan.
Lurraldebus txartela mantendu egingo da
Martxoaren 4an hasi ahal izango da Mugi txartela erabiltzen. Baina Lurraldebus txartela dutenek ez dute berria egin beharrik izango. Izan ere, tarifa-sistema berria zuzenean aplikatuko zaio Lurraldebusi ere.
RENFErako diru-poltsa
Tren txartela ordaintzeko orduan, Mugi txartelaren deskontuak ez dira aplikatuko, baina txartela erabili ahal izango da ordainketak egiteko.
Hiru txartel mota
Norberaren beharraren arabera, bakoitzak nahi duen txartel mota egin ahal izango du.
Txartel arrunta da bat. Bidaia bat eta 20 bidaiaren artean eginez gero, %45eko deskontua aplikatuko da. 21 eta 50 bidaiaren artean eginez gero, %56koa. Eta 51 bidaiatik gora eginez gero, %90ekoa. Deskontu bereziko txartela eskatzen dutenek berriz, deskontu bereziak izango dituzte, 25 urtetik behera edo 65etik gora izanez gero, %65eko edo gehiago ezintasuna izanez gero, edo laguntza soziala jasoz gero. Eta txartel anonimoa, pertsona batek baino gehiagok erabili ahal izango du.