Hernaniko PSE-EE alderdiak prentsa ohar baten bidez azaldu du, «aspaldidanik kezkatuta daudela Hernaniko langabezia tasekin. Izan ere, biztanleria aktiboa osatzen dute 12.300 hernaniarrek, eta horietatik 1.382 pertsona langabezian daude». Era berean argitu dute Hernaniko Udalak orain martxan jarri duen Enplegu Gunea «sozialistek aspaldi eskatutako zerbitzu bat dela, eta orain arte Gobernu Taldeak ez entzunarena egin duela».
2004an egindako proposamena
PSE-EEk dio «2004ko maiatzean, dagoeneko, proposatu zutela informe bat osatzeko», ondorengo datuak bilduko zituena: lan-eskaera zein zen, langabetuen ezaugarriak zein ziren, eta inguruko enpresek eskaintzen zituzten lan eskaintzak zein ziren.
Era berean, proposatu zuten Hernaniko Udaleko Formazio eta Lanbide Sailak programa bat sortu zezala Hernaniko langabetuak bideratu ahal izateko enpresek egiten zituzten eskaera errealetara.
Horregatik dio PSE-EEk «ez duela ulertzen nolatan jarri duen Hernaniko Udalak orain martxan Enplegu Gunea, sozialistek aspaldi eskatutako zerbitzu bat baita, eta orain arte Gobernu Taldeak ez entzunarena egin baitu».
«Udalak ez du dirurik bideratu Lanbide eta SEPEra»
Bestalde, PSE-EEk azaldu du zergatik bozkatu zuten 2013ko aurrekontuen kontra. «Udalak ez du dirurik bideratu Lanbide eta SEPE enplegu zerbitzuetara. Eskualdeko Enplegu Planerako dirua bideratu besterik ez du egin; 23.000 euro, zertarako balio duen ez dakigun plan baterako. Eskualdean dauden lan eskaera eta beharren inguruko informe bat egingo zela esan ziguten, baina oraindik ez dugu emaitzarik jaso, ez eta egiten den lanaren inguruko berririk ere».
Gaineratu dute, «poztu egin direla Hernaniko lan egoera nolabait konpontzeko neurri batzuk hartu direlako». Baina «Enplegu Gunea ez dela nahikoa» irizten diote. Izan ere, «Enplegu Gunea Udalak egin duen zuzeneko kontratua izan da; 20.000 euroko kostua izango du, eta 5 hilabeterako izango da, bakarrik. Gero, Eusko Jaurlaritzak zerbitzuaren ardura hartzea espero dute. Baina, ez al du Udalak langilerik, kontratatu dituen lan horiek egiteko?».
«Gehiago egin behar da»
Hori guztia kontuan hartuta, PSE-EEk dio «Enplegu Guneak eskaintzen duen zerbitzua positiboa dela, baina horrek ez du esan nahi hori egitea nahikoa denik. Dagoen lan-eskaintza erreala ezagutzeko beharra aldarrikatzen dugu, «langabetuei horren araberako formakuntza eman ahal izateko».