Goizean goizetik musikaren hotsarekin esnatuko dira aranoarrak larunbatean. Karnabalak ospatuko dituzte, eta egun osoko festa izango da.
Puska biltzen, Izer eta Alabierrekin
Goizeko 08:00etan puska biltzera abiatuko dira, karnabal zomorruak jantzita. Musikaren laguntza ere izango dute bidean: Izer eta Alabier trikitilariena, hain zuzen.
Eguerdi partera arte ibiliko dira hara eta hona, eta ondoren, bazkaria izango dute elkartean.
Zahagi Dantza, arratsaldean
Festarekin jarraitzeko, Zahagi Dantza ikusteko aukera izango da, arratsaldeko 17:30ak aldera.
Bertso afaria, Colina eta Sotorekin
Egunari amaiera borobila emateko berriz, bertso afaria egingo da Kontzeju tabernan. Bertsolariak ez dira nolanahikoak izango: Sustrai Colina eta Julio Soto gonbidatu dituzte, umore punttua jartzera.
Afari horretarako sarrerak 20 euro balio ditu, eta dagoeneko erosi daitezke, Kontzeju tabernan bertan. Telefonoz ere deitu daiteke bertara, zenbaki honetara: 948 51 42 79.