Aranok gaur egun 130 biztanle ditu, baina izan zituen 501 ere, adibidez, 1920an. Goizuetako parte zen aintzina, eta orain dela 380 urte herri izendatu zuten, 1630ean. Nafarroako erreinuko muga-mugako herria, Nafarroako Leonor erreginak 1404an agindu zuen muga liskartsu horretako eliza berritzeko, San Martin eliza hain zuzen ere, eta Aranoko biztanleei zergak barkatzeko, Castilla eta Nafarroaren arteko burruka asko sufritu behar zituztela eta. Armarri bat bada elizan, orduko Nafarroako azkeneko mugarria adierazten duena. Hori, eta kontu gehiago dakarzki beste urte betez, Miaxiriak, Aranoko aldizkariaren bigarren aleak.
Bertako kontuak,
eta bertako kontalariak
Miaxiriak Aranoko kontuak biltzen ditu, aranoarrek kontatuta: Erramun Huizi eta Roke Ansa zenaren gazte garaiko kontuak, Anttonio Ezeiza Exkerrak ezkil-hotsak nola izaten ziren: argi-ezkila eguzkia ateratzean, ama-ezkila eguzkia izkutatzean, angelusa...: din-din-din-dan!
San Roke elkartea nola sortu zen, Arano iruditan, Larritturriko labaderoa, umeen esanak eta umeek Arano nola nahi luketen: Azaharak nahi luke adibidez, jostailu denda Suron, eta Naroak Eurodisney Juandonostin...
Egileak ere, bertakoak denak: Josu Sarobe, Arantxa, Ainhoa eta Maider Ansa, Iñaki Egurza, Lourdes Legarreta, Pino Vicedo, Oscar Gascón, Jose Iñazio Salaberria, Xabier Legarreta...
Denbora pasarako tartea era bada: bertsoak, errezetak, letra zopa... eta baita xelebrekeriak ere, Aranon paseak:
«Aranoar bat badijua mandua goraino kargatua, eta hari isatsetik helduta. Isatsa re tirante nonbaitt ta auzoko batzuk ikusi dutenian, zerbaitt esan bihar ta:
-Hi! Zer hua, ordia, mandua hola kargatua ta gañe hi atzetik tirian!?
Ta bestiak, manduan atzetik:
-Hik zer dakik atzetik bultzian banua re!?».