Partidu benetan garrantzitsua jokatuko du Hernanik igandean. Ciencias Cajasol, aurkari zuzena izango du aurrez aurre. Hernani 10garren postuan dago eta sevillarrak postu bat aurretik daude, puntu baten aldearekin. Etxeko partidua izango da hernaniarrentzat, baina Donostiako Anoetako Miniestadioan jokatuko da. Izan ere, uholdeen eraginez, Landare ez dago jokatzeko moduan oraindik. Partidua 12:00etan hasiko da.
Joaneko partiduan Hernanik ondo ikusi zuen Cienciasek aurrelari sendoak dituela, eta joko horretan oinarritzen duela, batez ere. Hirugarren lerroan jokalari arriskutsuak ere baditu, De Juan esaterako. Arenasekin ere kontuz ibili beharko dute.
Zaleen bultzada
Inoiz baino gehiago, Hernanik bere zaleen beroa eta bultzada behar du eta herritarrei dei egiten diete Anoetara azaltzeko: «Landaretik oso hurbil dago». Etxeko partidu guztietan bezala, bazkideek doan izango dute sarrera eta gainerakoek 5 euro ordaindu beharko dituzte.