Hernanin Zero Zabor taldeak prentsa ohar bidez aldarrikatu du txotx denboraldian ere Hernani Zero Zabor herria dela.
Hernaniko Udalak hainbat neurri hartu ditu, sagardotegi denboraldian ere Hernanik ahalik eta zaborrik gutxiena sortu dezan, eta ahalik eta sailkatuena. «Honelako jai giroan plastikoa da neurriz gain sortzen den hondakinetako bat. Tabernetako edariak plastikozko basoetan zerbitzatzeko erabakia hartu zuen Udalak duela urte mordoxka bat, garai hartan kristalak, kristal hautsiak, beste arrisku batzuk eragiten zituelako. Baina geroztik erruz ugaritu da plastikoaren erabilpena eta, ondorioz, baita hondakinena ere. Plastikoaren gehiegizko erabilerari neurria jarri nahian, Udalak tratua egin du herriko tabernariekin 2013ko txotx denboraldirako. Otsailean eta apirilean, herriko tabernetan ez da zerbituko edaririk plastikozko edalontzietan, kristalezkoan baizik. Martxoa izaten denez txotx denboraldiko hilabeterik jendetsuena, garai horretan plastikoa erabiliko dute tabernariek kristalaren ordez. Plastikoa biltzeko konpromisoa tabernariek izango dute».
Plastikozko basoak kentzeko erabakiarekin batera, Hernaniko Udalak oihal haundi batzuk zintzilikatuko ditu Hernaniko kaleetan Hernani, Zero Zabor Herria diotenak, kanpotik Hernanira datozenentzat deigarri. «Udalaren eta tabernarien elkarlanarekin eta herritarren jokabide burutsuarekin, txotx garaian ere, Hernani Zero Zabor Herria!».