Aurtengo Inauteriak iragartzen dituen kartelak, umorea du oinarri. Bertan azaltzen da Txirrita zena, Hernaniko bertsolari ezaguna, pailazoz jantzita; sudur gorri, lore, zapata haundi eta guzti. Urretxu-Zumarragako hiru lagun izan dira egileak: Haritz Berasategi, Alex Areizaga eta Aritz Ormazabal. Halaxe azaldu dio Berasategik Kronikari: «Txirrita Hernaniko pertsonaia famatua da eta hasieratik argi genuen berarekin zerbait egingo genuela. Inauteriak direnez, mozorrotzea erabaki genuen. Bueltak ematen aritu ginen eta pailazoz janztea erabaki genuen. Umorea, alaitasuna eta festa giroa irudikatu nahi izan dugu».
600 euroko saria
Urretxu-Zumarragako hiru lagun horien kartelak iragartzen ditu aurtengo Inauteriak, aurretik Kartel Lehiaketa irabazi zutelako. Eta horrekin batera, 600 euroko saria. Urtero bezala, ia bi hilabetez izan zen aukera lanak aurkezteko.
Gattiken enpresa martxan
Hiru egileek, lehenengo aldiz hartu dute parte halako lehiaketa batean eta hemendik aurrera, jarraitzeko asmoa dute. «Izan ere, horrelako gaiekin zerikusia duen enpresa bat sortu berri dugu», dio Berasategik. Gattiken Produkzioak izena du enpresak eta diseinu grafikoa, web orriak eta bideoak egiten dituzte: gattiken.com.