Hernaniko eta Gipuzkoako bolariek hasi dute denboraldi berria. Joan den igandean izan zuten denboraldiko lehenengo tiraldia. Taldekako Txapelketa jokatzen da aurrena eta txapelketa horren barruan izan zen tiraldia Legazpin. Bihar, txapelketako bigarren eta azken tiraldia jokatuko da. Hernanin izango da, Florida auzoko bolatokian, 09:30etatik 11:00etara eta 16:00etatik 17:30etara. Bertan erabakiko da beraz, Gipuzkoako zein taldek dituen bolari onenak.
Zerain, aurretik
Legazpiko tiraldian, Zerain taldeak lortu zuen brila gehien botatzea, 279 brila, eta bera da nagusi. Hernaniarren artean, berriz, CD Hernanik lortu zituen emaitzarik onenak, 269 brila, eta 4garren postuan dago. Elur Txori berriz, 6garren postuan dago 255 brilarekin, eta Ur Mia, 8garrenean, 235 brilarekin.
Denera, Gipuzkoako 12 talde ari dira lehian.
Osaba eta Ugalderen
hutsunea nabari
Elur Txori taldeko bi bolari haundi zendu dira aurten, Nikolas Osaba eta Joxe Ugalde, eta haien hutsunea nabaria da bolari taldean, bai esperientzia aldetik bai laguntasun aldetik. Bi gazte sartu dira orain taldean eta hori ere poztekoa da, euren esanetan.
Talde bakoitzean seina bolari ari dira jokatzen, txapelketa honetan.
Iazko emaitza antzekoak
Iazko Taldeko Txapelketan, oraingo honetan, lehenengo tiraldian lortutako antzeko emaitzak lortu zituzten Hernaniko taldeek: CD Hernanik 4garren postua lortu zuen, Elur Txorik 5garrena eta Ur Miak 10garrena. Orduko hartan, 11 taldek hartu zuten parte eta Segurak irabazi zuen.
Hurrengoa, Bikotekako Txapelketa
Taldekako Txapelketa bukatzean, Bikotekako Txapelketari ekingo diote. Lehenengo tiraldia, urtarrilaren azken igandean izango da, Usurbilen. Lau tiralditara jokatuko da txapelketa.
Iazko txapeldunak, Miguel Burugain eta Joxe Ugalde izan ziren, Elur Txoriko kideak.
Lehendakari Txapelketa, Ereñotzun, eta Gipuzkoakoa, Floridan
Denboraldi osoan, beste bi tiraldi ere jokatuko dira Hernanin. Lehendakari Txapelketako hirugarren tiraldia Ereñotzuko bolatokian izango da. Eta Gipuzkoako Txapelketa, Floridako bolatokian jokatuko da.
Txapelketen egutegia
Taldekako Txapelketa
Bihar: Hernani
Bikotekako Txapelketa
2013-01-27: Usurbil
2013-02-03: Aia
2013-02-10: Lasarte
2013-02-17: Idiazabal
Lehendakari Txapelketa
2013-03-03: Añorga
2013-03-10: Mutiloa
2013-03-17: Ereñotzu
2013-03-24: Zerain
2013-04-07: Urnieta
Gipuzkoako Kopa
2013-04-14: Olaberria
2013-04-21: Altza
2013-04-28: Gabiria
2013-05-05: Ategorrieta
2013-05-12: Segura
Gipuzkoako Txapelketa
2013-05-18: Hernani
Beterano, jubenil eta infantilen Txapelketa
2013-05-26: Segura
Euskadiko Txapelketa
2013-06-08: Tertanga (Araba)