Denboraldiko laugarren finala du gaur, Ioritz Arrieta hernaniarrak, eta ez du edozeinen kontra jokatuko, gainera: Mikel Goñi profesional ohia izango du aurkari, Txurruka elgoibartarrarekin batera. Haiei aurre egiteko, Kerman Galarza galdakoztarra atzean izango du Arrietak. Partidua, 22:00etatik aurrera, Elgoibarren. San Anton torneoko finalera iristeko Atxotegi eta Altunari irabazi zien Arrietak eta Galarzak 22-12; bikote haundia hura ere. Gaurko finalerako indarrean da Arrieta. Ez da ahaztu behar, Munduko Txapelduna dela, 22 urtez azpikoetan. Tarbesen irabazi zuen txapel hori. Beste erronka haundi bat aurrean du hernaniarrak, eta gaur du zenbateraino den demostratzeko eguna.
Beste lau partidu, gaur
Gaur beste lau partidu ere jokatuko dituzte Hernaniko pelotariek: seniorretan, Arrasate/Leonet-Etxegoien (Arrasate, 20:30); jubeniletan, Goierri/Altuna anaiak (Urretxu, 18:00); kadeteetan, Loiarte-Rodriguez/Antigua
(Hernani, 21:00); infantiletan, Hondarribia/Rekondo-Arizmendi (Hondarribian, 19:15).
Aukera, pelota eskolan apuntatzeko
2001-2004 urte bitartean jaiotako mutiko guztiek aukera daukate pelota eskolan izena emateko. Kiroldegira azaldu eta Rufino Rekalderen galdera egin, egunero: astelehen, astezken eta ostiraletan (18:00-19:00), eta astearte eta ostegunetan (18:00-21:00).