Urgarden taldeak prentsa ohar batean azaldu du «administrazioek ibaien egoerarekiko ardura falta dutela; ibaiak, beren bazter eta urez gozatzeko ingurune naturalak bezala babestu beharrean, arrisku eta zikinkeria iturri baitira». Era berean, gogorarazi nahi izan dute «hau gure ingurunea dela, gure kezka eta gure erantzukizuna».
«Presazko neurriak»
Urgardenek dio, ibaiak garbitzeko eta ibaiak ezagutzeko bultzatu dituzten auzolan boluntarioei esker ohartu direla «ibaiak utziak daudela, zabor tonelada ugari jasotzen dela, sarbideak oztopatzen direla, hormez mugatu direla eta ubideek estolderia moduan jokatzen dutela». Ondorioz, «ibaien egoera hobetzeko presazko neurriak hartzea beharrezko dela» diote, baina «ez dugu uste ibaiak bideratzeko aurreikusitako lanek arazoari irtenbidea emango dienik, bitarte horretan ibaietan metatzen den zaborrak presa moduan jokatzen badu eta gainera, urbanizazioak uholde lautadetara hedatzen jarraitzen badira».
«Kontzientziazioa bultzatu»
Azkenik, Urgardenek azaldu du «jende gutxirekin bada ere, egin daitekeen aldaketa ikaragarria dela», eta beraz, ez dituzte erreklamatzen administrazioaren neurriak bakarrik, «herritarren kontzientziazioa eta konpromisoa ere bultzatu nahi ditugu». «Ez dugu zaborrik nahi gure ibaietan, eta ez dugu nahi zabor hau itsasora heltzerik».