Karbonera desalojatzeko aginduaren kontra, eta bertako lokala eta proiektuaren alde, bi emanaldi izango dira gaur, Karboneran bertan. Batetik, argazki emanaldia izango da, hitza eta musikarekin lagunduta. Nagore Legarreta argazkilariaren Edipotoa argazki-liburua ardatz hartuta, bi argazki serie proiektatuko dira, kamara estenopeikoarekin atereak. Poesia izango du lagun, zuzenean, Gorka Setien eta Haizea Arregiren ahotan. Musika ukitua, Mariano Hurtadok emango dio, kontrabaxuarekin.
Maá taldearen kontzertua, musika baino gehiago
Bikote bat izango da ondoren kontzertua emango duena. Okene Abrego ahotsean eta Mariano Hurtado bera kontrabaxuarekin. Bikote honek aspaldi ezagutzen du elkar, Inoreneroni taldetik. Talde horretako abestien bertsioak, Mikel Laboaren abestiren bat, eta bestelako piezak jo-abestu-errezitatuko dituzte. Esperimentazioak zati haundi bat hartuko du: kontrabaxu eta ahotsaz gain, haize instrumentuak, perkusioa, ahots jokoak...