ateri izango dugu gaur, euririk ez, eta eguzki izpi batzuk ikusiko dira. Urek eragindako kalteak neurtzeko garaia da, beraz. Atzo gauean alerta gorrian zegoen Hernani (Kronikak 20:30etan erredakzioa itxi zuenean), gaur gauerako espero ziren euriteei begira. Egun guztian zehar alerta gorrian egon zen atzo Hernani, baina urak ez zuen eragin herenegun baino kalte haundiagorik. Atzo, oraindik, ez zuten kotxerik aparkatzen utzi Portu eta Karabelgo parkinetan, eta itxura guztien arabera, gaur irekiko dituzte bi parkin horiek berriz. Errepiderik ez zuten itxi behar izan egun guztian, lur-jausi batzuk izan baziren ere: Errotaran inguruan (Osiñaga) eta abar.
Landare, ur azpian
Erriberetako baratzeetan eta Zubipen eta Landaren eragin ditu urak kalterik haundienak. Zubipe garbitzen aritu ziren atzo CD Hernaniko kideak. Landare oraindik ur azpian zegoen atzo.
Añarben ateak itxita
Añarbeko urtegiak jakinarazi duenez, herenegun goizaldetik urtegiak ateak itxita eduki ditu, ordurik txarrenak pasa arte. Tarte horretan, 5 miloi metro kubikori eutsi die Urumeara ixuri gabe. Atzo goizeko 10:00ak aldean berriz ireki zuten ate bat, ordu batzuetan, lekua irabazteko.