Ainhoa Vitoria, Jon Gotzon, Edurne Garmendia eta Joseina Etxeberria, Gaztea IrratikoDida! saioko lau esatariek gaur eguerdiko 12:30etan ireki dute, ofizialki, Hernaniko Txotx denboraldia, eta ez edozein modutan; kantuan, alai!
Euskal kantu ezagun batzuetako doinuak erabilita, bertso sorta goxo eta bizia kantatu dute, probatu duten sagardoa bezalakoa. Era berean, eskerrak eman dizkiete hernaniarrei, bertako Txotx denboraldia irekitzeko gonbita egiteagatik. «Hemendik aurrera inork ez dezala gaizki hitz egin gure aurrean Hernaniko sagardo denboraldiaz, Hernaniko sagardoaz, ez eta Hernaniko jendeaz ere. Benetan bihotzean eramango zaituztegu eta».
Jarraian, lehenengo tragoa hartu baino lehen, hernaniar guztiak ere, sagardo denboraldiaz gozatzera gonbidatu dituzte. «Edan asko; gehiegi ez. Mozkortu, pozez eta ilusioz posible bada, baina inoiz ez alkoholez. Biba zuek! Eutsi Hernani! Urte berri on!»