Sektoreko enpresetan kalitate turistikoa ezartzea da formazio programa honen asmoa. Behemendik, Turismo Lankidetzarako Erakundeak jarri du martxan, Euskalit Bikaintasunerako Euskal Fundazioaren eta Basquetour Euskal Turismo Agentziaren laguntzarekin. Era berean, Eusko Jaurlaritzak diruz laguntzen du programa hau, eta beraz, bertan parte hartzen duten enpresek ez dute ezer ordaindu beharko. Hil honen bukaeran Basquetourrek programaren inguruko xehetasunak emango ditu.
Turismo sektoreko enpresa eta elkarteei zuzendua
Formazio programa honen izena da Ekintza Onen Programa-Destinu turistikoetan Kalitatearen Programa’ (SICTED). Programa hau zuzenduta dago Donostialdea eskualdea osatzen duten 6 udalerrietan (Hernanin, Andoain, Astigarraga, Lasarte-Oria, Urnieta eta Usurbil) turismo sektorean lan egiten duten enpresa eta elkarteei: ostatuak, museoak, turismo enpresak, jatetxeak, sagardotegiak... Formazio programa honetan parte hartzen duten erakundeek, auditoria gaindituz gero, Kalitate Turistikoaren Zigilua lortuko dute lehenengo urtean, eta hurrengo 4 urtetan formazioarekin jarraitzeko aukera izango dute, Zigilua berresteko. Gainera, Behemendi Donostialdea Turismoguneko kalitateko teknikari baten laguntza jaso ahal izango dute. Helburua da turismo sektoreko enpresek negozioaren kudeaketa eta ematen duten zerbitzua hobetzea, eta turistari kalitatezko esperientzia eskaintzea.
Iparragirre eta Zelaia, dagoeneko Zigilua lortuta
Lehengo urtean jarri zen martxan programa hau, eta Donostialdeko 15 establezimenduk hartu zuten parte. Programako lehenengo zikloa bukatu dute, eta hortaz, laster Euskadi mailan egingo den ekitaldi batean Zigilua lortuko dute, tartean, Hernaniko Iparragirre eta Zelaia sagardotegiek.
Izen-ematea, zabalik
Hil honen bukaerara arte eman daiteke izena, programan parte hartzeko. Horretarako Behemendirekin jarri behar da kontaktuan, 656 705 243 telefonoan edo helbide honetan: donostialdea@behemendi.org. Formazio programa otsailean hasiko da, eta 15 enpresentzako dago lekua.