Waterpoloaz gozatzeko aukera ederra izango da bihar Hernanin. Izan ere, Hernaniko bi taldeek etxean jokatuko dute. Aurrena, senior mutilen partidua izango da. Eibarreko Urbat taldea izango dute aurrez aurre Kiroldegiko igerilekuan, 12:30etatik aurrera. Senior neskek ondoren jokatuko dute, 13:30etatik aurrera. Santoñarekin neurtuko dira. Miguel Angel Redondo entrenatzaileak Kronikari azaldu dioenez, mutilek partidu borrokatua eta zaila espero dute. Berdinduta daude eta hirugarren postua lortzeko lehiatuko dira. Eta etxekoek, aldeko faktore bat badutela azpimarratu du Redondok: «Hemengo igerilekua bost kaletakoa da eta zailagoa da horrelako igerilekuan jokatzea, ohituta ez dagoenarentzat. Horrez gain, daukagun guztia emango dugu». Nesken kasuan, berriz, sorpresa izango da nagusi: «Santoñak iaz ez zuen jokatu eta aurten guztiz eraberrituta bueltatu dela jakin dut. Gazte asko ere badituzte. Beraz, uretan egon arte ez dugu jakingo nolako aurkaria izango dugun. Hori bai, topera jokatuko dugu».
Mutilak sendo, baina
igotzeko aukerarik gabe
Mutilen taldea, Euskal Herriko bigarren mailan ari da jokatzen. 2010-2011 denboraldian lehenengo mailan jokatu zuen, baina iaz jaitsi zenetik bigarren mailan jarraitzen du. Gainera, aurten, nahiz eta denboraldi oso ona egin, ezingo luke lehenengo mailara igo. Izan ere, lehenengo mailara igotzeko, klubak, maila bajuagoko beste talderen bat izan behar du, gutxienez, eta aurten jubenilen talderik ez da osatu Hernanin. Dena dela, denboraldia ondo hasi dute hernaniarrek eta, «trantsizio urtea» izango den arren, goiko postuetan ibiltzeko asmoa dute, entrenatzailearen esanetan. 20 jokalari inguruk osatzen dute taldea.
Neskak, jokalari gutxirekin
Nesken taldeak Euskal Herriko lehenengo mailan jokatzen du; maila bakarra dago. Eta bosgarren postuan daude, 8 talderen artetik. Redondok azpimarratu duenez, «aurten 10 jokalari inguruk osatzen dute taldea eta hori nabaritzen da. Asko nekatzen dira. Dena dela, ondo hasi gara, taldea gaztea da eta oso pozik gaude». Lehendik waterpoloan ibilitako jokalari bat ere bueltatu dela gaineratu du. Gehienek ikasketen eraginez utzi egin behar izaten dutela azaldu du Redondok.
Aurtengo helburuaz galdetuta, hasiera batean aurreneko hiru postuen artean egotea zela azaldu du entrenatzaileak. «Baina oso talde indartsuak daude eta gu oso justu gabiltza. Jokalari gutxi izateak asko markatzen du». Hala ere, taldeak ez du oraindik daukan guztia eman: «Margen asko dugu hobetzeko eta egunetik egunera hobetzen doaz», dio. «Egia esan, bi taldeak oso ondo ari dira; ezin naiz kejatu».
Etorkizuneko erronka, ordutegi zabalagoa izatea entrenatzeko
Jubenilen talderik ez da osatu denboraldi honetan eta Redondo oso penatua dago, baina normala dela iruditzen zaio: «Oso ordutegi mugatua dugu eta gaztetxoek ez dute entrenatzeko aukerarik. Igerilekua ez da futbol zelaia bezala, jendeak egunero erabiltzen du eta arratsaldean ezin dugu entrenatzeko erabili. Gaueko 21:00etan hasten ditugu entrenamenduak eta ez dira orduak gaztetxoentzat. Klubak daukan erronka edo helburua bada, etorkizunera begira, ordutegi zabalago bat izatea. Gazteak behar ditugu, beraiek dira oinarria».