Prentsa ohar batean jakinarazi dute EAJ eta Hamaikabat! alderdiek Garbitania enpresako kontuen berri jakiteko eskaera egin dietela Luis Intxauspe Hernaniko alkateari eta Garbitania Zero Zabor SL enpresari berari. Era berean, Luis Intxauspe alkatea Garbitania enpresan Hernaniko udaletxeko ordezkaria dela ere azpimarratu dute. «Oposizioan gauden alderdiek gogorarazi nahi dugu Garbitania enpresa publikoa dela, eta enpresa honen %49 Hernaniko udaletxearen esku dagoela, eta beste %51, berriz, Usurbil eta Oiartzungo udaletxeen esku».
2012ko kontuak eta
2013rako aurreikuspena
Oposizioko bi alderdi hauek eskatu dituzten kontuak dira, «batetik, lehengo urteko kontuen inguruko datuak, eta bestetik, 2013rako aurreikuspenak; galera eta irabazien kontuak, balantzeak, inbertsioak, zorraren maila eta gehigarri pertsonalak. Tamalez, informazio hau guztia ez dago eskura, eta eskatu egin behar dugu».
«Desinformazioa, nagusi»
EAJ eta Hamaikabat! alderdiek diotenez, «gestio gardena eginez gero, udal enpresen datuak eman behar lirateke, eta beraz, enpresen kontuak edozein zinegotzi edo herritarren eskura egon behar lirateke, eta ez kajoi batean sartuta».
Era berean, diote «desinformazioa dela nagusi. Luis Intxauspe izendatu zuen Plenoak Hernaniko udaletxeko ordezkari Garbitania enpresako Akziodunen Batzorde Orokorrean, eta administrazio kontseiluko partaidea da. Hala dira, baita ere, Bilduko Beñat Amenabar eta Asier San Emeterio zinegotziak».
Gardentasun eske
Bi alderdiek diote «Garbitaniaren kudeaketan gardentasuna eskatzen jarraituko dutela». Horregatik, eskaera egiten diete «zinegotzi eta Garbitaniako kontseilari diren Luis Intxauspe, Beñat Amenabar eta Asier San Emeteriori, eskatutako datuak denen eskura jartzeko».