«200-500 ordu artean behar izan dut maketa bakoitza egiteko»

«Maketak, mundua elkar­tzen», halaxe deitu dio Sera­fin Hernandezek bere era­kus­ke­tari. Izan ere, bertan, in­gu­ru­ko, estatuko eta mun­du osoko eraikin esanguratsuenen ma­ke­tak jarriko ditu ikusgai. Ha­la nola: Aieteko jauregia, Do­nostiako Justizia jauregia eta udaletxea, Co­ru­ñako Hercu­lesen dorrea, Pisako dorrea, Eiffel dorrea, Madrilgo zezen plaza, Biz­kaiko Puentekol­gan­tea, Taj Mahal... «Nere azken harribitxiak ere ikusgai egongo dira: Pariseko Notre Dame katedrala, Moskuko San Ba­silio katedrala....», dio Her­nan­dezek. Denera, 20 maketa inguru izango dira.
Erakusketak bihar zabalduko ditu ateak eta hilaren 22ra arte izango da lanak ikusteko aukera. Biterin izango da, astelehenetik ostiralera, 18:00etatik 20:00etara.

«Geroz eta maketa
zailagoak egiten ditut»
Serafin Hernandez jaiotzez Extremadurakoa da eta umetan etorri zen Hernanira bizitzera. Portu auzoan bizitu zen, ezkondu eta Pasaiara joan zen arte. Egun, bertan bizi da.
Beti egin izan du lana egurrarekin. Enpresa familiar bat dauka eta ostalaritzara zuzendutako lanak egiten dituzte. Egurrezko serbilleteroak eta tabernako barran pintxoak jartzeko plater itxurako euskarriak, beraiek asmatutako lanak dira, besteak beste. Orain dela 15 urte, maketak egiten hasi zen. «Jubilatua nago eta zerbait egin beharra daukat», dio.
Hasieran, egindako ma­ketak erosten zituen oinarri bezala, baina orain dena, berak egiten du: «Interneten bilatzen ditut argazkiak, angelu ezberdinetatik ateratakoak, neurriak...». «Geroz eta maketa zailagoak egiten ditut», azaldu du. «Maketa bakoitza egiteko 200-500 ordu artean behar izan dut. Udaletxeak 15.000 pieza dauzka; bera izan da gehien kostatu zaidana», dio.

Zailena, antolatzea
Hernandezek azaldu du, ma­ketak egiterako orduan, zailena, antolaketa dela: «nondik hasi, zer jarri aurrena... ondo pentsatu behar da».
Egurra erabiltzen du maketak egiteko eta batez ere, haritza: «harri efektua egiten du eta hori gustatzen zait». Zenbait detaile pinta­tzen ditu, baina orokorrean barnizatuta bakarrik daude.

Eskolako umeei erakusteko asmoa
Hernandezen zenbait maketa aurretik ikusgai ere izan dira. Adibidez, Donos­tia­ko udaletxearen maketa bi hilabetez egon zen ikusgai udaletxean bertan, eta Aieteko jauregia­re­na ere bai, jaure­gian. Zen­bait elkarrizketa ere egin dizkiote komunikabide ezberdinetan.
Orain, Biteriko erakusketa aprobetxatuz, eskolako umeei erakustea gustatuko litzaioke eta Kronikari azaldu dioenez, ikastetxeetako arduradunei proposatzeko asmoa du.