Javier Urrizak ez zion aukerarik eman Julen San Migueli eta 30-18 irabazi zion atzo Buruz Buruko Masterreko finala. Iruñeako aurrelaria aurreneko tantotik nagusitu zen. Azken garaipen honekin, denboraldiko txapela garrantzitsuenak lortu ditu. Udan, Buruz Buruko Txapelketa Nagusia irabazi zuen lehenengo aldiz, orain dela bi aste, Binakako Txapelketa irabazi zuen laugarren aldiz eta orain, Masterra irabazi du. Txapeldunaren esanetan, «partidu borobila egin dut. Finalerdietan baino hobeto atera dut eta horrek konfiantza haundia eman dit». Lortutakoa baloratu eta aurrera begira ere jarri da: «Urtea, sinestezina izan da. Inoiz ez nuen halakorik imaginatuko. Orain aurkariek gehiago exigituko didate eta hori erronka bat izango da neretzat. Ikasten jarraitu behar dut eta txapela gehiago irabaztea espero dut».
Hasieratik nagusi
Urrizak hasieratik oso serio jokatu zuen; San Miguelek, berriz, ez zituen ideiak oso argi eta motel xamar ibili zen. Urriza 5-0 jarri zen aurretik eta pixkanaka aldea haunditzen joan zen: 18-4. Hortik aurrera, San Miguel jokoan sartu zen eta partidua parekatuagoa izan zen, baina berandu, 14 tantotako aldea gehiegizkoa baitzen. Dena dela, 10 tantotara gerturatzea lortu zuen. 27-17. Urrizak 17 tantorekin bukatu zuen, lau fallorekin eta sakez egindako 7 tantorekin. San Miguelek 3 tanto egin zituen sakez eta peloteoan, 11 tanto eta 6 fallo.