Halako plaza batean aritzen zen lehenengo saioa zuen Eli Pagola hernaniarrak, ostiralean, baina ez zen atzean geratu. Nerbioak antzeman arren, Biterin bildu ziren 120 lagunen aurrean etorria baduela erakutsi zuen 17 urteko gazteak eta lotsagabe aritu zen. Azpimarratzekoa, Iker Zubeldiari botatako erantzunak. Sebastian Lizasorekin ere ederki aritu zen aholku eske. Lizasok fin erantzun zion; bertso saio osoan ondo aritu zen bertsolari azpeitiarra. Iker Zubeldiaren ateraldiak ere nabarmendu ziren. Txisparik haundiena atzekoei, beste bertsolariei kantatu zienean piztu zuen. Iñaki Zelaia hernaniarrak ere saio ona egin zuen. Aspaldiontan oholtza gainean gutxitan ageri bada ere, berezko oinarria oso fuerte daukala argi geratu zen. Orokorrean, oso saio polita eskaini zuten 6 bertsolariek (Odei Barroso eta Igor Elortza ere bertan izan ziren). Amaia Otxotorena aritu zen gaijartzaile lanetan. Saioa bukatzean askok aipatu zuten motz egin zitzaiela.
Gustora, aurtengo Bertsolatarekin
Bertsolata, ostiraleko bertso jaialdiarekin bukatu da. Inoiz baino ekitaldi gehiago izan dira aurten eta Bertso Eskolako kideak gustora dira izan duten erantzunarekin. Oso balorazio positiboa egin dute. Umeen saioa, Basque Culinary Centerreko saioa, Olentzeroa, Elkarteetako Txapelketa, Bertso musikatuak, Erronda eta Jaialdia egin dira. Hiru bereziak izan dira. «BCCko emanaldia oso polita izan zen. Aretoa bete egin zen, 200 lagunek hartu zuten parte eta maila haundiko jaialdiaz gozatzeko aukera izan zen. Soziedadeetako Txapelketan agian, ez dugu asmatu ondo zabaltzen, baina 50 lagun bildu ginen afaltzen eta giro polita sortu zen. Bertso musikatuetan berriz, asmatu zuten jendearengana iristen. Herriari lotutako bertsoak sartu zituzten, bertso eskolako kideenak eta izan direnenak... Oso saio erakargarria egin zuten, kontuan izanda lehenengoa ez dela inoiz onena izaten», azaldu du Aitor Mendiluze Bertso Eskolako kideak.
Eta gaineratu du: «Ekitaldi gehiago izan dira, Soziedadeetako Txapelketa Bertsolataren barruan sartu dugulako aurten eta BCCko saioa antolatu delako, besteak beste. Eta proposamen horiek etorri egin zaizkigu, gugana jo dute eta oso positiboa da hori, Bertso Eskola erreferente bihurtu baita».