Ezkontzak, hiletak, bataioak... zerbitzu ezberdinak eskaintzen dituzte Parrokiek eta urte honetatik aurrera, zerbitzu bakoitzarengatik donatibo jakin bat eskatuko dute. Hala azaldu dio Kronikari Hernaniko Parrokiarteko Kontseiluak, prentsa ohar bidez: «Gaur egun Hernaniko Parrokiek zailtasunak ditugu ohiko gastuei eusteko, hala nola, tenpluen mantenua, argindarra, berogailua, etabar. Duela garai batetik hona, donatiboak dezente jaitsi dira eta honek ekarri gaitu beste bide batzuk asmatzera, ekonomi arazoari aurre egiteko. Gure kristau elkartea bizirik eta jardunean mantentzea eliztar guztion erantzukizuna dugu».
Eta gaineratu dute: «Badakigu, gutako etxe bakoitzean, hilabetez hilabete, hainbat gasturi erantzun behar izaten diogula. Gauza bera gertatzen da gure Parrokietan ere. Hori dela eta, 2013ko urte honetan, gure Parrokietan eskaintzen diren zerbitzuen araberako donatibo jakin bat ezarriko da. Norbaitek zailtasun ekonomikorik balu, bere gain utziko da borondatezko donatiboa ematea».
Donatiboak:
EZKONTZAK.................150 euro
HILETAK........................50 euro
BATAIOAK......................30 euro
1go JAUNARTZEAK.........30 euro
SENDOTZAK...................30 euro
KATEKESIA....................20 euro + 10 euro (liburua)
HILDAKOEN MEZAK........10 euro
ZIURTAGIRIAK.................5 euro