Gipuzkoako Trinkete Txapelketa azken txanpan sartu da eta bertan dira lau pelotari hernaniar. Hiruk finalaurdenak jokatuko dituzte gaur, jubenil mailan. Egoitz Altunak Oiartzungo Flores pelotariaren aurka jokatuko du. Altuna oso txapelketa ona egiten ari da eta bera da faborito. Dena dela, ezker eskuko behatz batean lesio bat du eta partidua zaildu daiteke ondorioz. Donostiako Gaska trinketean izango da 09:15etan.
Iñigo Arizkorretak, berriz, Urnietako Imaz pelotaria izango du aurrez aurre. Hernaniarrak partidu zaila espero du, urnietarra txapela irabazteko faboritoetako bat baita. Gaskan izango da 10:00etan.
Eta Unai Bandresek Oiartzungo Azpirozen aurka jokatuko du. Bandresek ere partidu zaila izango du, txapelketa irabazteko faboritoetako baten aurka neurtuko baita. Gaskan izango da 14:00etan.
Senior mailan izango da beste partidua. Bigarren mailan, final zortzirena jokatuko du bihar Aritz Murgiondok. Usurbilgo Mendizabal pelotaria izango du aurrez aurre. Murgiondo da faborito. Gaskan izango da 10:00etan.
Mailari eusteko, bi partidu
Bi pelotarik bi partidu garrantzitsu jokatuko dituzte gaur, mailaz ez jaisteko. Senior lehenengo mailan, Ander Lopezek Usurbilgo Huizi izango du aurrez aurre. Partidu gogorra izango da. Gaskan jokatuko da 16:15etan.
Ioritz San Sebastian ere egoera berean da. Oiartzungo Sarastiri irabazi beharko dio mailari eusteko. Gaskan izango da 17:00etan.