Ipuinak kantatuz ere kontatu daitezke. Gaur arratsaldeko 18:30etan, Tolosako Topic zentroan, ikuskizun berezia izango da, antzerkia, txotxongiloak eta musika elkartu dituena. ‘Hernani’ Musika Eskolako abesbatzak parte hartuko du ikuskizun horretan, beste hainbat abesbatza eta musikarirekin batean.
Bi ipuin
Ikuskizunean bi ipuin kontatuko dira, biak, David Azurzak konposatuak eta Joxemari Iturraldek idatziak.
Abesbatza hernaniarrak bigarren ipuinaren kontakizunean hartuko du parte; Hurkus errementaria izenekoan. Errementari bakarti bat da Hurkus, zatar xamarra, baina bihotz onekoa. Herrian zabaldu da gaiztoa dela, eta Satanek hori horrela ote den jakiteko, infernura eramango duen deabrua bidaltzen dio Hurkusi.
Lehenengo ipuina Erlauntzaren sekretua izango da. Erleen jakinduriari esker lanak ezinhobeto egiten dituzten bi baserritarren istorioa kontatzen da. Hirugarren baserritar batek, inbidiak jota, guztia zapuztu nahiko du.
Sarrerak, Topic-en
Helduek 7 euro ordaindu behar dituzte, eta haurrek, 4 (familia ugariek deskontuak dituzte). Sarrerak salgai daude Tolosako Topic zentroan edo www.topictolosa.com webgunean.