Hilabete honetan bi sari irabazi ditu Ainara Azpiazu Axpi komikigile hernaniarrak. Abendu hasieran Galtzakomik Saria eskuratu zuen eta orain gutxi, euskerazko tira onenaren saria, Arrasateko sexismoaren kontrako komiki-tiren lehiaketan. Eta artean, Olentzero iristeko zegoen. Hala azaldu dio Kronikari: «Berria eman didatenek esan didate aurten Olentzero lehenago etorri dela neregana, eta egia borobila!». Axpik sekulako poza hartu du sari honekin: «Nere lanak nolabaiteko errekonozimendua lortzearen poza, euskeraz lan egitearen poza eta genero berdintasunaren baloreei behar bezalako garrantzia ematearen poza». Axpik egindako komiki-tira, gona jantzi nahi duen mutil koxkor bati buruzkoa da.
400 euroko saria
Euskeraz eta gaztelaniaz aurkeztu zitezkeen lanak eta jokoan zeuden lan onenaren saria, euskerazko lan onenaren saria eta bi aipamen. Axpik 400 euro irabazi ditu. Denera, 20 lan inguru aurkeztu ziren estatu osotik. Lehenengo saria gaztelaniazko batek eskuratu du.