Emanaldi berri bat aurkeztuko dute gaur arratsaldean Imanol Kamiok, Eñaut Agirrek eta Aitor Atxegak, Bertsolataren barruan. Historiaren hari zahar horri... izeneko ikuskizuna estreinatuko dute, arratsaldeko 19:30etan Biterin. Bertso zahar eta berriak entzuteko aukera izango da bertan, momenturako jarriak, doinu zahar eta doinu berriekin. Emanaldiak ordu eta laurdeneko iraupena izango du.
Berri eta zahar, ezagun eta
ezezagun
Gaurko emanaldian bertso zahar eta berriak kantatuko ditu Eñaut Agirrek. Imanol Kamiok eta Aitor Atxegak berriz, musika jarriko dute; eskusoinu eta pianoarekin batek, eta gitarrarekin, besteak. Doinu zahar eta berriak joko dituzte, hauek ere.
Ordu eta laurdeneko ikuskizunean denetariko bertsoak entzuteko aukera izango da; historikoak eta berriak, ezagunak eta ezezagunak. Horien artean, ondorengo bertsolarien letrak entzun ahal izango dira: Txabolategi, Artzai, Txikia, Txirrita, Udarregi, Pello Errota, Lazkao Txiki, Loidisaletxe, Lazkano, Goiburu, Maialen Lujanbio, Unai Iturriaga, Mikel Altzuart eta beste hainbatenak.
Sarrerak Biterin,
emanaldiaren aurretik
Sarrerak 5 euro balio du, eta Biteri kultur etxean bertan erosi ahal izango dira, emanaldia hasi baino lehen.
Bertsolata bukatzeko,
2 emanaldi
Aurtengo Bertsolatan aspaldian baino saio gehiago izan dira. Baina hauek ere bukatzen ari dira. Bi emanaldi besterik ez dira gelditzen.
Lehenengoa datorren astelehenean izango da. Urtero bezala, urtezahar gaueko errondan kantari aterako dira.
Urtarrilaren 4an berriz, urteroko jaialdi haundia izango da, punta-puntako bertsolariekin. Arratsaldeko 19:30etan Biteriko oholtza gainean izango dira Sebastian Lizaso, Igor Elortza, Odei Barroso, Iñaki Zelaia, Iker Zubeldia eta Eli Pagola. Amaia Otxotorena izango da gaijartzailea.