bigarren astean sartu da Bertsolata, aspaldiko egitarau haundienarekin. Aste honetan hiru bertso ekitaldi daude prestatuak, astelehen, ostiral eta larunbaterako. Astelehenean, Olentzero ibiliko da baserriz baserri, gabon eskean, bertsoa eta musika lagun dituela. Zikuñaga eta Osiñaga auzoetan ibiliko dira, eta autobusa ere izango dute. Gudarien plazan, 15:30etan. Herritar guztiak daude gonbidatuta.
Bederatzi elkarte, bertsotan
Ostiralean, abenduak 28, Hernaniko Soziedade Gastronomikoak neurtuko dituzte indarrak, bertsotan, Sagastialde elkartean (bera baita babeslea). Iaz Karobi elkarteak irabazi zuen, Beñat Gaztelumendi bertsolariarekin. Aurten 9 elkarte izango dira, eta bertsolari banak ordezkatuko ditu: Unai Gaztelumendi (Txantxangorri); Iñaki Zelaia (Peña Otaño); Eli Pagola (Santa Barbara); Aritz Zerain (Urmia); Amaia Otxotorena (Sagastialde); Xabier Legarreta Arano (San Roke); Oier Iurramendi (Karobi); eta Asier Azpiroz Azpi (Xalaparta). Oraindik badira 25 sarrera salgai, Aralar tabernan, 18 euroan (afaria eta saioa barne). Larunbatean, bertso musikatuak izango dira Biterin. Emanaldia estreinatuko dute Eñaut Agirrek, Imanol Kamiok eta Aitor Atxegak.
Bertsolata, ‘gutiziazkoa’
Bertsolata indarrean hasi da. Umeen saio jendetsuaren ostean, ostegunean, Basque Culinary Center bete egin zen, eta gozatu polita hartu zuten inguratutakoek. Aperitibo ederra, gutiziazko Bertsolatarako.