Herbnani elkartea, ikerketa esperimentalen eta cannabis erabiltzaileen Hernaniko elkartea da. Urtebetez gestio lanetan eta dokumentazio lanetan aritu ondoren, abuztuan sortu zen elkarte bezala eta abenduaren 14ean aurkeztu zuten Akarregi poligonoan daukan lokalean (Akarregi poligonoan, 10 zenbakian, rotonda parean). Herbnani, irabazi asmorik gabeko elkartea da, bazkide bidez funtzionatuko du, eta asmoa du merkatu beltzetik ateratzeko marihuana kontsumitu nahi duten pertsonak. «Saltzen dena, lapurtua denez, kalitate txarrekoa da, prezio abusiboak jartzen dira... Horrez gain, jendeari informazioa eman nahi diogu. Ez da ilegala, baina askok ez dakite zenbat kontsumitu dezakegun, zenbat landatu dezakegun... Multen aurrean nola jokatu behar den ere azalduko dugu. Jendeak ez daki errekurtsoak jartzeko aukera dagoenik. Horrez gain, kontsumo arduratsuari buruzko informazioa emango dugu, tailerrak...», azaldu dio Hugo Sá elkarteko presidenteak Kronikari
«Ez dugu apologiarik egiten, erregulatzea eskatzen dugu»
Herbnaniko kideek argi diote euren asmoa ez dela inongo apologiarik egitea, «ezta ere erre behar den edo ez esatea. Baina kontsumitzaile garen heinean eta legala den heinean, egoera erregulatu nahi dugu eta jendea informatu nahi dugu. Normalizazioa eskatzen dugu, estatuak erregulatu dezala. Jendearen beharra da».
Erabilera terapeutikoari buruzko informazioa
Batzorde terapeutikoa ere badu elkarteak; Kike Parras da Batzordeko presidentea. Izan ere, Herbnanin, erabilera terapeutikoei buruzko informazioa ere emango dute eta saioak ere egingo dituzte bazkideen artean. Cannabisak eskaintzen dituen erremedio terapeutikoak honakoak dira: tinturak, erromero-alkohola, baporizadoreak, kremak, olioa... Minak arintzeko egokiak direla dio Kike Parrasek. «Tintura, esaterako, 5 tanta edo hartzen dituzu; aldea sekulakoa da. Kremek, berriz, ume baten ipurdia bezain leun uzten dute azala».
Ez zaie interesatzen legalizatzea
Hain ona bada, zergatik saltzen da oso txarra izango balitz bezala? Parrasek argi dauka: «Ez zaielako interesatzen legalizatzea. Erromatarrek bere garaian erabiltzen zuten baliabide terapeutiko bezala eta baita lehenago ere. Baina debekua Ipar ameriketatik dator, ez zitzaileako komeni merkatu hori, beste interes batzuk baitzituzten. Eta gainerako herrialde askok debeku horretan oinarrituta jokatu dute. Gainera, debekatu zuten debekatu nahi zutelako, ez azterketa edo datuetan oinarrituta».
Bazkideek, 21 urtetik gora
Elkarteak bazkide bidez funtzionatuko du eta bazkideek honako ezaugarriak izango dituzte, besteak beste: 21 urtetik gorakoak izango dira, cannabis kontsumitzaileak izan behar dute, fakultate mentalak ondo eduki behar dituzte eta estatutuetan zehazten den araudia bete behar dute. Bazkideek kuota bat ordainduko dute eta diru iturri horrekin egingo dituzte elkarteko ekintzak. Elkartea asanblearioa izango da. Herbnani, EUSFACen (Euskal Herriko Cannabis erabiltzaileen elkarteen federazioa) barruan dago.
Kontsumoa, kontrolatua
Herbnanik gehienez, 300-400 bazkide izan ditzake. Oraingoz 25 bazkide dira eta gehienbat adinekoak direla diote. Bazkide berriak, batez ere, bazkideek beraiek sartuak izango dira. Norbaitek bazkide egin nahiko balu, aukera izango luke baldintzak eta arauak betez gero, eta zuzendaritzak onartuz gero. Neurri horiek kontuan izango dituzte, kontsumoa kontrolatua izateko. «Hemen produzituko dena bazkideen kontsumorako izango da eta hirugarrenak tartean ez sartzeko edo salmentarako aukerarik ez sortzeko, bazkide bakoitzak aurretik esan behar du zenbat kontsumitzea aurreikusten duen. Horren arabera, kultibatuko da. Araudiak dio pertsona batek egunean 2g inguru kontsumitu ditzakeela. Orduan, astean 15g izan daitezke», diote.
2013an zehar, ekintza ezberdinak
Hastear den urte berriari begira, hainbat ekintza antolatzeko asmoa dute: hitzaldiak, San Canuto eguna, San Joanetan kata bereziren bat, hilabetero katak, tailerrak erremedio terapeutikoen inguruan: krema tailerra, tintura tailerra, erromero-alkohola egiteko tailerra...