Bereziki, Atez Ateko zabor bilketaren aurrekontuaren aurka agertu dira EAJ eta H1! alderdiak, eta horregatik, gaurko Plenoan kontrako botoa emango diote datorren urterako Udal aurrekontuari. Horrez gain, EAJ alderdiak beste proposamen batzuk egin ditu, Gobernu Taldeak aurkeztutako aurrekontuaren hainbat punturen inguruan.
Gardentasun eza
Hamaikabat alderdiak aurkeztu duen emendakinean dio, Udal aurrekontuek «iritzi kontrajarriak sortu arazi» dizkiela, izan ere, «partida batzuetan aurrezteko ahalegina egin da, eta beste batzuk ukiezinak direla ematen du». Bereziki, Hamaikabatek kritikatu ditu Garbitania enpresak eta Atez Ateko zabor bilketak sortzen dituen gastuak eta kasu horietan azalpenik ez ematea. «Garbitaniaren aurrekontuak Udal aurrekontuekin batera ezagutu behar genituzkeela» dio H1!ek, hala nola, «kontratazioen inguruan, enpresaren egoera ekonomikoaren inguruan...». H1!en ustez, «interes-partidistak daude tartean». Horregatik dio, «Bilduren interesak hernaniarrenen gainetik jartzen» direla, eta «Udala sukurtsala besterik ez dela, Garbitaniaren inguruan ez baitu ezer erabakitzen». H1! alderdiaren ustez, «ez genuke mailegurik beharko, aurrezteko politika Atez Ateko zabor bilketari aplikatuta, eta Gipuzkoako Foru Aldundiari itzuli beharrekoa ondo negoziatuz gero».
Sistema garestiegia
EAJ alderdiak ere, bereziki Atez Ateko sistemaren aurrekontuaren aurka egin du. Emendakinean adierazitakoaren arabera, «5garren eta 6garren kontenedoreak jarrita (azken hau konpresa eta zapi higienikoetarako), milioi bat euro inguru aurreztuko genituzke». Gobernu Taldeak egindako proposamenean berriz, «Garbitania erakunde publikora 1.533.000 euro eta Atez Atekora 50.000 euro bideratzen dira».
Dirulaguntzak igo, eta Gobernu Taldearen asesoreak kendu
Udal aurrekontuen proposameren aurka EAJk aurkeztutako emendakinean proposamen gehiago ere egiten ditu alderdiak. Batetik, salatzen du «diru-sarrerak puztuta daudela: Young Play urbanistikoki aprobetxatzeko aukera ez dago ziurtatuta, teknikoen esanetan, eta Foru Fondoak egingo duen aportazioa %7,7an igotzea gehiegizkoa dela dio udal ikuskatzaileak». Bestetik, EAJk dio «bizilagun elkarteei, kirol taldeei edo 3garren mundura bideratutako dirulaguntzak erdira jaitsi beharrean, beste partida bat erabili daitekeela horretarako; kultur jarduerak antolatzeko kolektibo jakin batzuetarako laguntza, hain zuzen». Era berean, eskatzen du «kiroletako langileei dekretazo bidez atzeratutako pagak ordaintzea». Aurrezteko egiten duen proposamena da: «Gobernu Taldearen asesore eta nahierara kontratatutako langileentzako partidak kentzea, eta funtzionarioekin bakarrik lan egitea». Azkenik, eskatzen du «proposamen berriak egin beharrean, dauden proiektuak aurrera eramatea. Adibidez, Plaza eta Tiloseta berritzea, pistina irekietako tabernari errentagarritasuna ateratzea edo Kaxkoko komertzioak bultzatzea».