Haro Rioja Voley Club taldeko libero berria da aurtengo denboraldian, Esther Lopez jokalari hernaniarra. Kronikari adierazi dionez, oso gustora dago Lopez talde berrian. «Talde honetan jokatzeko eman zaidan aukerarekin oso pozik eta oso gustora nago».
«Denboraldia bikain
hasi dugu»
Oraindik goiz dela dio Lopezek, baina onartzen du «denboraldia bikain hasi» dutela. «Denboraldiko lehenengo helburua zen Espainiako Superkopa irabaztea, eta lortu dugu». Horrez gain, Superligan lehenengo postuan dago taldea. «Oraindik ez dugu lehenengo bueltarekin bukatu, baina oso ondo ari gara, eta lanean jarraitzeko asmoa dugu».
Helburuak ere ez dira makalak. Izan ere, Esther Lopezen hitzetan, «taldearen helburua da Superliga eta Erregina Kopa irabaztea».
Onenen artean
Hernaniko Kirol Elkarteko boleibol taldean egin zituen bere lehenengo pausuak Esther Lopezek, eta hortik aurrera, gero eta maila altuagoko taldeetan ibili da; besteak beste, Toledo, Ciudad Real, Gasteiz, Caja de Avila, Burgos, Tenerife, Club Voley Miranda, eta lehengo urtean, Menorcako Club Voleibol Ciutadellan.
Horrez gain, Europako libero eta jokalari onena izendatu dute hainbat denboralditan, eta taldean ere, hainbat sari irabazi ditu. Horien artean, Champions League bat, 3 Erregina Kopa, 3 Superliga eta 4 Superkopa.
Jarraitzeko asmoa
Haroko taldearekin denboraldi baterako fitxa egin du, baina Lopez gustora dago, eta ezer esateko goiz bada ere, onartzen du: «ni oso pozik nago, eta talde honetan gustora jarraituko nuke».