Kirolean landu beharreko genero berdintasunari buruz hitz egingo duzu gaur.
Benetako datuak edo adibideak emango ditut; eta ez aspaldikoak, gaur egungoak baizik, 2012koak. Kirolean, egoera ezberdina da gizona edo emakumea izan; baldintzak ez dira berdinak eta berdintasuna lortu behar da, soldatetan, sarietan, ordutegietan, instalazioen erabileran… Hausnarketa garaia da. Jende askok pentsatzen du gizartea garatzen doala, gauzak bere bidean doazela eta zentzu honetan ez dagoela ezer egin beharrik; baina asko dago egiteko oraindik. Kirol arloan parte hartzen dugun guztiok dugu zeregina: gurasoek, kirol elkarteek, federazioek, instituzioek…
Zer egin dezakete kirol elkarteek?
Lau arlotan hartu behar dira neurriak, batez ere:
1.- Barne antolaketa: Zergatik elkarteko lan txarrenak emakumeek egin behar izaten dituzte? Paperak egitea, esaterako. Horrez gain, elkarteek gardenak izan behar dute. Non hartzen diren erabakiak argi utzi behar da. Lana ondo banatu behar da eta irizpideak ere jarri egin behar dira. Esaterako, ondo zehaztu behar da zeren arabera banatuko den dirua.
2.- Baliabideen erabilera: Baliabide ekonomikoak ratio-en arabera banatu behar dira. Lehiaketa berdinera eraman eta nola da posible emakumeek lo, hotel okerragoan egitea? Instalazioen erabileran ere lan haundia dago egiteko. Ordutegi onenak ere gizonezkoentzat izaten dira. Entrenatzaileei dagokienean, kontuan izan behar da, maila berean ari badira gizonezkoak eta emakumezkoak, entrenatzaileek berdina kobratu behar dutela. Eta arbitroen kasuan ere bai, eta askotan ez da gertatzen.
3.- Komunikazioa: Kontuan izan behar da, irudien erabilera, hizkuntzaren erabilera… Emakumezkoei merituak kentzen dizkiete askotan prentsan. Prentsaz aparte, orokorrean komunikazioan garrantzitsua da euskarri guztiak zaintzea eta interneten, gomendatzen dugu emakumeen albisteak lehenago jartzea; gizonezkoena bilatuko dute, beherago baldin badago ere. Eta argazkiak jartzea ere gomendatzen dugu.
4.- Elkartearen eskaintza: Kirol modalitateak egokitu behar badira, egokitu; kategoriak berriro antolatzea komeni bada, berriro antolatu... Eta ez du denak lehiakortasunarekin lotura izan behar, beste modu batera pentsatu behar dugu, jendeak kirola egin behar du gozatzeko: emakumezkoak eta gizonezkoak nahastu, adin ezberdinetako jendea nahastu… Zerbitzu osagarriak eskaintzea ere gomendagarria da.
Eskola garaian edo gazte garaian neska askok egiten dute kirola. Gero utzi egiten dute, etorkizunik ez dutelako ikusten.
Eusko Jaurlaritzan, Euskadi Kirola Fundazioa daukagu martxan. Bertan goi mailako kirolariekin egiten dugu lan eta askorekin hitz egin dugu horri buruz. Azaltzen dute txikitatik argi zeukatela ezingo zutela bertatik bizi. Batzuk jarraitu dute, baina beti kezkatuta etorkizunarekin. Emakume guztiek dituzte goi mailako ikasketak, gizonezkoen erdiak, berriz, ez. Ez dute kezka hori izaten. Baina hori ari gara aldatzen Fundazioaren barruan dauden kirolariekin, behintzat.
Hernaniko egoeraren inguruan zer esango zenuke?
Egoera zehazki ez dut ezagutzen, baina orokorrean, beti hobetzeko gauza asko egon arren, ez gaudela batere gaizki esango nuke, Estatu mailako egoerarekin konparatuta. Talde feministek egindako lanak ere asko lagundu du.
Kirolean benetako berdintasuna iritsiko dela uste duzu?
Argi eta garbi daukat ez dela iritsiko, baina asko hobetuko da egoera.