Datorren urteko aurrekontu proposamena aurkeztu zuen Gobernu Taldeak astelehenean, herritarren aurrean. Hala azaldu zuen Luis Intxauspe alkateak: «Egoera zaila eta ezegonkorra izango da 2013an eta datozen urteetan. Honen aurrean zorrotz aritzea dagokigu, razionaltasunez jokatzea. Gastuetan arreta berezia jarri dugu, beharrezkoak ez direnak baztertuz. Diru sarreretan, zergak eta tasak ezartzerakoan, bi printzipio izan ditugu oinarri: ekitatea eta progresibitatea». Datu ekonomiko orokorrak aurkezteaz gain, datorren urtean Udalak egin nahi dituen proiektuen berri ere eman zuten. Arlo sozioekonomikoak izango du lehentasuna, «egoera zailenean bizi direnei ahalik eta zerbitzu eta laguntza eraginkorrena eskaintzeko». Emandako datuen arabera, 2012an baino 602.028 euro gehiago izango du Udalak 2013an. Hain zuzen, 30.097.416 euro. Zerga eta tasetatik izango da diru sarreren igoera eta ondare sarreretatik ere bai.
Zergetan eta tasetan, igoera
Zergetatik diru gehiago jasotzea aurreikusten du Gobernu Taldeak. Orokorrean, %2,4ko igoera izango dute zergek, baina zenbait zergetan igoera haundiagoa izango da Diputazioaren Foru Arau aldaketak tarteko. Izan ere, Diputazioak zergak biltzeko modua aldatu du (gehien daukatenek gehiago ordainduko dute), eta esaterako, hutsik dauden etxebizitzei %50eko igoera aplikatuko zaie.
Tasak ere orokorrean %2,4 igoko ditu Udalak datorren urtean, baina beste faktore batzuk ere eragingo dute diru sarrera igotzea. «Urari dagokionean, errolda haunditu egin da, hau da, etxebizitza gehiago daude, beraz diru gehiago bilduko da. Horrez gain, kontadore indibiduala dutenek eta komunitarioa dutenek berdina ordainduko dute», azaldu zuen Minerrek. Hondakinen kasuan ere, errolda haunditzeak diru sarrera haunditzea eragingo du.
Hernani txartela sortu
Gobernu Taldeak bere proiektuen artean, arlo sozioekonomikoan helburu du, enplegua bultzatzea, turismoa indartzea, Fiare banka etikoaren kide izatea, herriko merkataritza indartzea... Azken horri dagokionez, Berriak elkartearekin Hernani txartela sortzeko asmoa du. Dendetan erabiltzeaz gain, Kiroldegira sartzeko ere balioko du. Kiroldegiko sarrera hobetuko da bide batez.
Ongintzari dagokionez, zerbitzuak mantendu eta hobetzeko asmoa dute. Eta Politika Sozialean, berdintasuna landuko dute, arlo guztietan; besteak beste, kirolean.
Urumeako eraikina bota
Ingurumena eta herri garapenaren alde, hainbat egitasmo proposatu dituzte: garraio publikoa bultzatzea, bidegorrien sarea lotzea, oinezkoei lehentasuna ematea (Portu-Karabel bidea egin, Etxeberriko eta Portuko tunelak egokitu...), ur kontsumoa jaistea, baratzeen parke publikoa egitea, auzokonposta zabaltzea... Horrez gain, Urumea ikastola, Elkano kaleko eraikina, botatzea aurreikusten da eta trafikoa hobetu eta aparkalekuak egitea.
Hernani partaidetzaren barruan, auzotarrekin biltzen eta lanean jarraitzeko asmoa du Gobernu Taldeak. Baita, Hezkuntza, Gazteria, Euskera eta Kultura bultzatzen jarraitzekoa ere.
Kirol arloan, aurrez aipatutako egitasmoez gain, Kiroldegiko bigarren pistako estalkia berrituko dute.
Emendakinak egiteko epea
Aurrekontu proposamenari emendakinak aurkezteko epea zabalik dago oraindik. Horrez gain, Batzordetik pasa ostean, Plenoak eman beharko dio onarpena.