Gai desberdinei buruzko hiru hitzaldi izango dira gaur arratsaldean Hernanin. Alde batetik, Tejiendo sueños en Guatemala: una educación para la vida izeneko hitzaldia izango da, 19:00etan Biterin; bestetik, Hitz gogoetatsuak, hitz askeak izeneko hitzaldia 19:00etan Ikatza Liburugunean; eta azkenik, Erabileraren gako batzuk: zazpi ebidentzia, 19:30etan Biterin.
Guatemalako egoera
Bideo proiekzioa eta hitzaldia antolatu dituzte Hirugarren Adina Hirugarren Mundurako ONGD elkarteak eta Guatemalako Fe y Alegriak. Guatemalako Jocotan Chiquimula eskolan ur putzua egin dute Hernaniko Udalak emandako diru laguntzari esker, besteak beste, eta azken proiektu horri buruzko proiekzioa izango da. Horri buruz eta Guatemalako egoera politiko eta sozialari buruz azalpenak emango ditu Miquel Cortes Fe y Alegriako zuzendariak.
Preso egondako
emakumeen bizipenak
Ikatza Liburugunean hiru hitzaldi antolatu dituzte abenduan, kartzelaren inguruko bizipen kritikoak azaltzeko eta gaur izango da lehenengoa. Preso egondako hainbat emakumeren bizipenak entzuteko aukera izango da. Hurrengo hitzaldia ostegunean izango da: Emakume gazte eta militanteak kartzelan.
Euskera indartzeko,
7 ebidentzia
Xabier Amurizak, bertsolari, politikari eta idazlea denak, besteak beste, bere azken liburua aurkeztuko du gaur Hernanin: Zazpi ebidentzia birjaiotzarako. Euskeraren biziraupenerako zazpi gakoak zeintzuk diren aztertu du liburuan eta horien berri emango du. Gakoetako bat, honakoa: «lexikoan (hitzak) irizpide askoz zabalagoz eta internazionalagoz jokatu behar da».
Hitzaldiak:
19:00etan, ‘Tejiendo sueños en Guatemala: una educación para la vida’, Biterin.
19:00etan, ‘Hitz gogoetatsuak, hitz askeak’, Ikatza Liburugunean.
19:30etan, ‘Erabileraren gako batzuk: zazpi ebidentzia’, Biterin.