Ane Lujanbio
Luix Errazkin marrazkilari hernaniarrak erakusketa jarriko du Biterin, bihartik abenduaren 21era arte. Bertan, ikusgai egongo dira, batez ere, lumaz egindako irudiak, pastelez margotutakoak eta oleozko paisaiak.
‘Grattage’ teknikan, hamaika lan
Ikusgai izango diren lanen artean, Errazkinek teknika desberdinez landutakoak aukeratu ditu. Grattage teknika erabiliz sortutakoak, hau da, irudiak negatiboan/txurian daude fondo beltzaren gainean, grabatu moduan. Sail honetan, Gurutzeaga, Txalaparta edota Harresiko arkupea izeneko lanak aurkituko ditugu, horrela hamaika lan osatu arte.
Leku ezagunak luma eta margo pastelak erabiliz
Lumaz marraztutako lanen artean, berriz, toki ezagun hauek ikusi ahal izango dira: Andoaingo Sorgin zubia, Donostiako Konstituzio plaza, Sagastietako trikuharria, Madina etxea, Leoka, Salamancako La Alberca, Yandene, Zerain… Donibaneko kaia, Agorregiko erreka, Orioko txalupak, Elorrabiko zubia (azkeneko uholdeetan desegina), Mundaka, Etxola berri herriko baserririk urrunena. Margo pastelak erabiliaz egindako leku hauek ere ikusgai izango dira bertan. Oleoz margotutako paisaiak ere izango dira, aurten eginak direnak. Horien artean bada bat nahiko haundia, Buruntza izenekoa, neurriz 120x160 cm-koa, beste bi, Mollarri eta Zaintzen 100x100 cm-koak eta horiez gain Hernaniko kale nagusia, Txintxorroak, Artesaua...
Denera, 86 lan ikusgai
Egun hauetan Biteri kultur etxera gerturatzen denak, guztira 86 lan ikusteko aukera izango du, lehen esan bezala, era askotakoak: txuri beltzean, kolorezkoak, grabatuak... Ordutegia, 18:00etatik 20:00etara, astelehenetik ostiralera.
... ikusi eta marraztu
Erakusketan diren marrazkien artean, herriko baserri batzuk daude, gehienak nahiko ezberdinak. Horien artean: jauregi/dorretxe antzekoak, bere lehio eta ate arkudunekin, jatorrizko txabola zaharretatik gertu xamar daudenak, fatxadaren zabalera osoa hartzen duten egurrezko balkoi landuak, zutarri baten gainean eraikiak... Baserrien kokalekua ere asko aldatzen da marrazki batetik bestera: mendi magalean, erriberan, kaxkoetan... alegia, nonahi diren baserriak marraztu ditu Errazkinek.